Home / archiefcentraal / denne van knoldert tomtomtom

denne van knoldert tomtomtom

TomTomTom

Een moat van mie is gek op kaarte kieken. In het precomputertiedperk had ie d’r gin kind an op vakantie want hij bekeek kaarten van de ömgeving. Was wat lastig met de ofwas doene, want dan was e ok altied in de kaarten gedoken, mar het was handig vöar uutstappies met auto, fietse, zelfs te voet.

Die moat heet Tom. Het verbazen mie in het computertiedperk dan ok niks det het apparaat det nog völle mear van kaarten wus, de naam TomTom kreeg. Tom is sowieso wel trots op zien vöarname. Hij nuumt zien vrouw altijd Tompoes.

Ik ben van ‘t joar zonder Tom mar – vöar het earst – met TomTom op vakantie ewest. En ik mut zeng: het is een zegen. “Ik geleuve det wie disse ofslag haa’n munn hemm’” is een vaste vakantie-uutdrukking die ons in de auto, mar die hebbe wie disse vakantie niet ehöard.

Ule hebt de ofgelopen wekken eleazen woar as ik oaveral ewest binne disse vakantie. Nergens fout erene. Wat een genot. De camping was niet in of bie een woonplaatse, mar zie haa’n wel coördinaten van noorderbreedte en westerlengte. TomTom zetten ons of töt an de receptie.

Op de terugweg gaa’m ze vieftig kilometer vöar de Gotthardtunnel an det d’r tien kilometer file stund. Tied genog öm TomTom de weg te loaten zuken oaver de pas.

Mar Tom giet TomTom niet verre genog. Hij zög noar een TomTomTom-oplossing. En ik mut zeng: hij hef een mooien bedacht. Ik heb zo’n automower van Van Gurp uut Wieje in de tuin. Zo’n schildpad die een paar uur per dag het grös dut terwijl ik d’r een biertie bie drinke. De mower meijt ‘ad random’, zo as det zo mooi heet. Det betekent det e mar wat lukraak hen en wear giet. Iedere kear an de grens van zien territorium maakt e een hoek van 60 groaden en wieder giet het wear.

Noa een goeie wekke kun ie an het gazon ziene det de mower alles ehad hef. Mar is det ok zo? De proef giet wönn det d’r een GPS-ontvanger 24 uur op de rugge van de mower kump te ling. Iedere ofslag wördt vaste leg en het resultaat noa 24 uur mut het bewies weane. As het werkt zet Tom die TomTom gegevens op Google Earth en det is dan de TomTomTom.

Ik hoppe det de proef lukt, want as bewezen is det de mower echt alles pakt, drink ik mien pilsie een stuk geruster.

Denne van Knöldert

Lees ook

Plannen nieuwe inrichting N337 bij Den Nul en Olst ter inzage

ZWOLLE – De plannen voor een nieuwe inrichting van de Rijksstraatweg (N337) in Den Nul …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.