Wie bent bienoa wear terugge van vakantie. En heel langzaam mar zeker kan ik de drang öm een krante te kopen steeds mulijker onderdrukken. Det hef een aantal oorzaken. Belangriek is det mien internettegoed van de tillefoon op is, dus kan ik nu.nl niet mear bekieken. Mut ik toch op een andere maniere an het neejs komm. Op een veerboot van het iene noar het andere Griekse eiland zag ik op tv-schermen det wereldwied de beurzen ineen stort. Det maakt mie vöaral genoeglijk neejsgierig ömdet ik al mien aandelen al lang en breed verkocht hebbe. Alle reden dus een krante te kopen.
De neejsbehoefte was tussendöar eam e temperd want ik had mie onverdacht een Telegraaf ekocht. Wilders en Cohen oaver de Noorse slachtpartieje. Van der Sar noar Italië. En FC Twente de supercup. Die moandag was het, en ik wol het graag ollemoal weten. Mar noa de Telegraaf van die ochtend wus ik het nog niet. Ie wördt d’r niks wiezer van. Wilders mog zonder nuance de partij van de Arabieren nog ‘ns kear ofmaken zonder de teengvroage of zien vrijheid van meningsuiting soms ok gevolgen zollen kunn hemm’. En FC Twente had de beker ewunn noa twee cruciale beslissingen van de scheidsrechter, las ik. Een terechte penalty en een terechte rooie kaarte. Het lik mie det de scheidsrechter doar niks met de maken hef, mar de spöllers. Geschreven vanuut een Ajax-hart, bedach ik mie. Mar ja, de krante keus wel vaker de verkearde kante, zulle wie mar denken.
Mar noe de voetbalcompetitie wear an de gang is, wul ik het toch ollemoal wel weer volgen. Nog een reden dus, de krante te kopen, vöar de sport, mar as vanzelf döarumme ok vöar de rest van de wereld. En zo kwam ik een verhaal teeng over resomeren. Det woard deut mie denken an amoveren, wat een mooi woard is vöar slopen. Resomeren is een alternatief vöar begraa’m of cremearen. Wult ze in Nederland ok in goan voeren. Dan legt ze oe in een machine en dan wörd ie vanzelf töt stof. Schient het meest milieuvriendelijk te weane. In Canada en de VS doet ze het al.
“Hij heeft in zijn leven de wereld een keer of dertig rondgereden met zijn auto en daarom hebben we gekozen voor een milieuvriendelijke uitvaart. De resomatie in donderdag om 10.00 uur.” Ik kan nog niet hillemoal wennen an zo’n zinne op een rouwkaarte.
Denne van Knöldert.