Home / archiefcentraal / denne van knoldert kreta

denne van knoldert kreta

De verhoging van de BTW op theaterkaarties mos een paar miljoen opbrengen. Mar ömdet de kaarties duurder bent, wördt d’r minder van verkocht. Effect: minder meansen in het theater, niks extra’s in de staatskas. Hearlijk, die bestuurders. Slim volk.

In Roalte kriegt anvroagers gin zebrapad met as argument det chauffeurs toch niet mear vöar zebrapaden stopt. Det is echt een antwoard van de gemeente. Mar det antwoard klopt hillemoal niet. Heb ie wel ‘ns ezene hoe jonge moeders det doet? Die drukt earst de kinderwaang de weg op, as de auto stopt, goat ze d’r zelf achteran.

Zulke zaken bent niet zo goed vöar het vertrouwen in alles wat de gemeente, de provincie, het rijk dut. Mar wat maakt het uut. Een nieuwe deuk in het toch al gebutste blazoen, zie ie toch niet.

Mooie discussie was vöarige wekke ok het inhaalverbod vöar vrachtwagens. Onze VVD-vriend Abtroot gaf ons earst al twee minuten tiedwinst met zien 130 kilometer per uur. De ziektekosten dalen ok, ömdet bie ongevallen noe minder gewonden mar mear doden valt. Hij bedach van de wekke een inhaalverbod vöar vrachtwagens. En de PvdA sleut zich d’r bie an. Mar de VVD-minister was teeng, die leng liever mear snelweg an. Behalve dan in Salland, want doar is de N35 niet earder dan in 2040 an de böarte. Die weg kon wel wat mear VVD gebruken, zei die partij met de verkiezingen. Als ik eweten had det ze dit bedoelden, had ik op ze estemd.

Mar koploper in verlies van vertrouwen in ons bestuur is het Griekse eiland as onderpand vöar Finland as de Grieken de lening niet terugge betaalt. Het is een echt Christelijk Joodse traditie de buurman te helpen met de garantie det ze oe töt de laatste cent terugge betaalt. De Finnen wollen baar geld terugge as Griekenland ondanks de hulp failliet zol goane. Rutte dach det de Finnen een eiland wollen hemm.

Ik loop noe al de hele wekke te prakezearen hoe det dan giet: Kreta, as provincie van Finland. Bent wule net een bittie van Aruba, Bonaire, Curaçao of, kriegt die Noarmannen iniens wear neeje koloniën, met moderne slaven die heel jong met pensioen goat.

“Zie wollen een eiland as onderpand”. Rutte zei het met dreuge oong en met die uutleg was iederiene tevreden. Althans, d’r kwam bienoa gin reactie op. Kan ok weane det iederiene dach: “die premier van ons is niet zo mar gek, die is knettergek.”

Denne van Knöldert

Lees ook

Wiegeliedjes en nachtmerries in Nicolaaskerk

WIJHE – Sinje Kiel en David van Ooijen verzorgen op zaterdag 7 augustus een concert …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.