Het is mie elukt. Ik ben vöarige wekke met een OV Chipknip met de busse in Deamter terechte ekomm, nam doar de trein noar Schiphol en toen was het de keus: een last minute noar Italië of noar Griekenland. Het is Italië ewonn ömdet Griekenland op de rand stund failliet te goane. Ja, en dan zul ie d’r mar zitten.
Mar ik was nog niet geland op Sicilië, of ik höaren det Italië net zo hard op het faillissement ofstevent as Griekenland. Minister De Jager van Financiën wol het d’r niet oaver hemm, hij wol nog niet iens speculearen oaver noodhulp, want het ging heus nog wel goed met het land van Berlusconi. Noa, dan weet ie het wel: alle hens an dek.
De crisis kump döar domme uutspraken van Berlusconi. De man van de Bunga Bunga feessies had geweigerd te bezunigen, niet op basis van verstandig of onverstandig, mar op basis van herkiesbaar weane. In Europa zit het CDA in dezelfde partieje as disse meneer die an mediadictatuur dut, in rechtzaken verwikkeld is wegens corruptie en omkoping en in zien vrieje tied sex hef met kleine meissies. Gek hè, det zo’n man ok op financieel gebied wel eens domme uutspraken dut. De Jager vund van wel.
Gelukkig, ik zit op Sicilie. Op det stukkie Italië goat ze niet gauw failliet. Want doar is de Maffia de baas. Zie handelt hier niet allenig in honing en eigengemaakte geitenkaas, ik kon met het grootste gemak ok wel wat cocaïne met noar huus krieng. “Det verdient sneller dan jenever smokkelen”, wussen ze mie te vertellen, “Al hillemoal nu jullie een extreem rechts land bent e wönn. Doarvan stijgt de pries van cocaïne.”
Mar dan was het better det ik de volgende keer met de auto kwam. “Een bittie hoge anhanger”, advisearen ze mie, dan konn d’r ok illegalen in. Det is nog better vöar de handel. Hullie wussen ok wel van de vliegende brigades an de Nederlandse grens die zuukt noar illegale mensensmokkel. Mar ik heb gin verdacht oald bussie, dus ik komme vanuut Sicilië zonder problemen disse kante op.
Zie stellen mie dubbele handel vöar. De henweg ongewenste allochtonen ofvoeren die hier vrogger onder mild regime van de VVD döar werkgevers noar toe ehaald bent en die noe wear weg mut wegens streng regime van de VVD. En dan de terugweg illegalen importeren ömdet werkgevers de asperges toch ok uut de grond wult hemm.
Volgend joar mar ‘ns goed oaver noadenken.
Denne van Knöldert