Wie hebt van de wekke beschuut met muusies egetten. De kippe had kukenties ekreeng. En in de wereld woar van iedere gebeurtenis een event emaakt ewördt, kan ik niet achter blie’m. Ik wus allenig niet of het blauwe of roze muusies mossen weane. Want hoe kun ie det ziene bie zo’n klein kukentie?
Het was nogal een wonder det de kippe een kuken uut het ei had ekreeng. Det wonder begun al bie de hane die earst iets ín het ei mos stoppen. An zien kraaien te höaren was het niet zo’n hane van stavast. As wie d’r ’s mons al wakker van wönn, kreeg ik mear het idee noar een Italiaanse kastraat te lusteren dan noar een echte Stroatkjel.
Vervolgens ging de kippe as een gek broeden op alles wat lös en vaste zat. Op een gegeven moment had e twaalf eieren onder de vearen. Öm die te verzamelen had e twee wekken alle eier van zien hokgenoten d’r bie egapt. Die hokgenoten vunn’ det ollemoal niet zo erg, die leng gewoon iedere dag wel wear een neej exemplaar en ondertussen hoe’m ze de hane met iene minder te delen. Mar ik was minder gelukkig. Want mien ontbijt-eities laang noe ollemoal onder de kippe.
En as of de duvel d’r met spöllen, wönn d’r ok nog twee aandere kippen broeds. Met mekare konden die wel dertig eieren onder hun hoede hoalen.
Noa dree wekke was ik het wel zo’n bittie zat. De earste kippe zol zo ongevear uut ebroed weane. D’r waren nog gin kukens. En ik wol wear eieren. Mar nummer twee was nog mar halverwege zien broedtied. En nummer drie was net begun. Ik kon muuilijk de eier onder die beessies vandan halen. Opetten was gin optie. Want stel det d’r wél een kuken in iene zat. Met die twiefel was weggooien ok gin optie.
Wie gaam ze nog íen wekke. Töt ofgelopen zundag. En wat dach ie? Zoaterdag an het eind van de dag kreup d’r zo’n jong kukentie döar het hok. En det gif mie as pleegolder iniens heel andere zörge. Wat mut zo’n beesie etten? Hoe bescherm ik die teeng roofvogels? En de katte – die van de wekke nog een kwikstattie te grazen had – zol die ok gek op kukenties weane?
Benieuwd wat d’r in de loop van de wekke nog uut die aandere dertig eieren kump. Moch het een groot succes wönn, dan denk ik det ik mar met olderschapsverlof goa.
Denne van Knöldert