“Ie haa’n 31 meart munn betalen en hie hebt pas op 3 april betaald. As ie de volgende kear wear te late bent met betalen, leavert oe det een boete van vieftig euro op, met een minimum van 50 euro.” Zie doar de brief van de belastingdienst woarmee ik de zoaterdagmonn begunne.
As d’r ien instantie is die de bek mut hoalen oaver nie op tied en te late, dan is het de belastingdienst wel. Lest bellen ik ze nog op de Belastingtelefoon. “Uw wachttijd bedraagt tussen de twee en vier minuten” zei een stemme noadet ik uut een keuzemenu mar wat egokt hadde, want de vroage die ik had, zat niet bie de keuzes.
Twee tut vier minuten, det is mie nog al een marge. Ik had bedacht det ik noa de wachttied zol zeng det ze mie de volgende kear tien euro mut betalen vöar iedere minute det ze te late oppakken. Mar toen ik d’r noa 24 minuten iene an de lijn krege, was ik det al lange wear vergetten.
Een boete as het de volgende kear wear gebeurt. Hoelange hangt mie die straf boam het hoofd? Een kwartaal? Een joar? Mien hele leam? Vervalt de straf as de belastingen zelf een fout maakt? Via de belastingtelefoon kon ik doar niet achter komm. Toen ik 24 van de verwachte vier minuten wachttied had uut ezetten bleek de juffrouw an de tillefoon het antwoard niet te weten. D’r was sowieso niet iene op kantoar die doar iets van of wus. Zelfs ‘Hoogachtend, De inspecteur’ was d’r op det moment nie.
Ik zal het ‘ns vroang an zo mar wat personeel. As ik wat vrogger noar mien werk goa met de trein van Roalte noar Enschede, tref ik altied völle belastingambtenaren die ok op weg bent noar hun werk in Almelo. As ik wat later dan gemiddeld wear noar huus goa tref ik ze trouwens ok.
Drie daang te late betalen is in het bedrijfsleam trouwens heel gewoon. ‘Binnen veertien dagen betalen’ zet ik altied op de nota’s die ik te verzenden hebbe. Mar niet iene die doar wat op uut dut. Ik heb wel iens oaverwöang iene een brief te sturen det e dree daang te late was en det ik ‘m de vollende kear gewoon twee procent bie de nota op drukke. Mar ik ben bange det d’r dan nooit een volgende kear kump.
Denne van Knöldert