Het wördt steeds lastiger op zundag öm 19.00 uur nog gin enkele uutslag van de voetbalwedstrijden van die middag te weten. Ik wulle, as ik met het börd op schoot op Studio Sport wacht, hillemoal blank noar de samenvattingen kieken.
As ik nog gin uutslag wete, is de spanning het grootst. Mar zo langzamerhand is de spanning nog groter öm al die uutslaang te ontlopen.
Ik ben een Teletekstkieker en volg ok op zundag eam het landelijk nieuws via Teletekstpagina 104 en verder. Ik probear bewust niet in te stromen op 100 of 101, want dan leas ik zo mar iniens ‘ Twente nieuwe koploper’ . Tja, dan weet ik al wear te völle.
Mar op zundag noar Parijs-Roubaix kieken is ok heel ingewikkeld ewönn. Dan krieg ie iniens zo’n tickertape onderlangs met de standen van de eredivisie. Het lukt mie niet noar de wielrenners te bliem kieken zonder mien oong noar die tickertape te loaten schieten. ’t Is net as een gesprek voeren met een vrouw met te diep decolleté. Oe oong wördt gewoon noar det borstbeeld ezöang. Dus as de uutslaang onderlangs dreijt, hoal ik mien hand zo tussen oong en tillevisie det ik een deel van het beeld ofscherm.
Kons ging mie det verkeard en zag ik toch det Ajax – Heracles 0-0 was e wönn. Earst balen ik. Mar met verstandig noadenken heb ik det in een jubelgevuul weten ömme te zetten. Twente had PSV al versloane en Ajax had 0-0 espöld. Wear een kampioen uut het oosten.
Zit ik ’s oams plichtmatig noar Ajax – Heracles te kieken en maakt keeper Pasveer een enorme blunder. 1-0 vöar Ajax. Ik denk earst nog det die goal wel of eköard zol goan wönn, mar det geböaren niet. Conclusie: die standen van die middag waren tussenstanden… Was ik dus vöar niks die hele middag blie e west en ging Ajax ok nog winn ok.
Ik twitter ok graag. Mar ok det is niet mear verstandig. Ik volg Jan Mulder en die geeft steeds zien commentaar op wedstrijden.
Mien twee dochters gaa’m vrogger niks öm voetballen. Mar sinds die manvolk met oaver de vloere brengt, is het van uut die hoek ok uutkieken. Ik heb d’r een dictatoriaal regime op in esteld: op zundag hebbe wie het oaveral oaver, mar niet oaver dinge die ik niet weten wullen en niet oaver de eredivisie.
Zundag 19.00 uur: Studio Sport, det is al veartig joar zo. Doar verandert niemand of niks wat an.
Denne van Knöldert.