Home / archiefcentraal / denne van knoldert succes

denne van knoldert succes

Het aantal ongelukken met klussen in huus nemt toe, hebt ze onderzöcht. Zelfs het aantal doden nemt toe. ’t Is verdubbeld. Töt veartig per joar. De stichting Consument en Veiligheid kwaamp vöarige wekke met de cijfers op de proppen.

Het zol komm döar de recessie. En döar het aantal klusprogramma’s op de tillevisie. Mar ik denk eigenlijk mear det ‘Consument en Veiligheid’ zich zelf op de kaarte wul zetten. Zichzelf snel eam belangriek maken, öm te vöarkomm det ze wegbezunigd wördt.

130.000 Meansen per joar goat noar het ziekenhuus öm zich te loaten behandelen an een doe-het-zelf-ongeval, dubbel zo völle as vear joar terugge. Och, de cijfers zult wel kloppen. Mar det wul nog niet zeng det d’r dubbel zo völle ongelukken geböart. Ik heb stellig de indruk det de meansen gewoon sneller noar de dokter en het ziekenhuus goat.

Zo bellen mien zunne pas geleden op. De jongen is het huus uut en had zich bie het sniene van een uitie een stuk van de vinger of esnede. “Bloeden det det dut”, zei e. “Mut ik d’r met noar de dokter?” Ik zeg: “As het bloedt, is de wond schone. Doe d’r mar een pleister op. As het bloed doar nie döarkump, valt het wel mee. En zeg oe vrouw mar det ie vöar de verandering rooie uities ekocht hebt.” Kiek, aanderen goat doar met noar het ziekenhuus. Det beïnvloedt de cijfers.

Mear ongelukken bie het doe-het-zelven? De definitie kan ok op’erekt weane. Een kennis van mie hef zien eigensten huus verbouwd. “Mien man is an het klussen”, zei zien vrouw doaroaver. Mar teengwoardig ben ie al een doe-het-zelver as ie de Ikea-kaste zelf in mekare dreijt. As ie het doarmet an de rugge kriegt, is det een klusongeval. Ik weet niet of plots opkommende psychische klachten ok met telt, want det kan ok flink in de cijfers döartellen met de Ikea-spul. Twiddegroads psychisch labiel as de kaste dan eindelijk stiet. Earstegroads van slag as oe vrouw dan de klöar toch nie mooi vindt.

Ie komt d’r mar zo met op de earste hulp van het ziekenhuus. Het telt ollemoal döar in de cijfers. Mar ja, of het noe mear is e wönn, gelieke bleem, of of’enömm, 130.000 gewonden en veartig doden, het bent mie nogal getallen. Noe begriep ik wel wrum ze bie de doe-het-zelf-zaak altied ‘bie de kassa altied zegt: “en succes d’r mar wear met”.

Denne van Knöldert

Lees ook

Nieuwe fietsroute rond Sallandse Heuvelrug in teken van streekproducten

REGIO – De HORT, Hellendoornse Ondernemers in Recreatie en Toerisme, Toeristisch Bureau Hellendoorn en Salland …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.