Ik heb het huus vöarige wekke estofzuugd. Det is een werkie det ik niet zo vake doe. Mar wat is det nog een ingewikkeld werk. En dan heb ik het nog hillemoal niet oaver hoe ie in hemelsnaam onder de banke mut komm met de stofzugervoet. Nee het ingewikkelde zat ‘m wat mie betreft in de werking van de stofzuger.
Wat mie an het begin opveul is de ingewikkelde dreij an het uuteinde van de slurf. As ie het goed doet, kun ie met een slange in alle richtingen toch gewoon rechtuut bliem stofzuung. Mar det hef zo völle techniek in de voet töt gevolg det hij vanwege zien heugte niet oaveral mear onder kan. Niet onder de banke bevobbeld. En stof weet det, kwaamp ik achter, det verzamelt zich angstvallig onder die banke teeng aanvallen van de stofzuger…
Ok vernuftig is de kracht van de stofzuger. Ik had bie anschaf – det was töt vöarige wekke de ienige kear det ik bie het stofzuung betrökken was ewest – wel iets op evang oaver een veranderende zuugkracht, mar det was mear het verhaal van de klok en de klepel. D’r zat net een neeje zak in de stofzuger en de motor stund op volle kracht. Met as gevolg det de voet niet allenig stof opzeug, ok het mattie in de wc ploepsen an de stofzuger. De leste muggen van het joar waren ok niet veilig. Mar toen ik ok de katte beet had, ben ik tien minuten op zuuk ewest noar verminderde motorkracht. Bleek ik de an- en uutknoppe niet te munn indrukken, mar ömmedreijen. Multifunctioneel dingetie.
Toen ik kloar wasse mos het snoer terugge in de machine. Ik had mien vrouw het snoer een kear de stofzuger in zien floepsen. Mar hoe deud zie det? Het lukken mie niet… Tut ik de stofzuger wegzetten. Iniens scheut een stukkie kabel noar binnen. Aha, het zol iets te maken kunn hemm’ met de maniere woarop ik die kabel behandelen? Kort an rukken heulp niet. Noar de linker en rechter boamhoek trekken wol ok niet. Heel langzaam uuttrekken en dan iniens lös loaten, doar trappen e ok niet in. Het huus was al zowat wear an een zuugböarte toe, toen ik het döar hadde. Hillemoal uuttrekken en dan lösloaten. As een adder vleug de kabel noar binnen. Töt e zich zelf in de weg zat wegens een slinger. Zes pogingen verder heb ik de stofzuger met droad butenboard op ebörgen.
Dus as doar nog ‘ns een kear een industrieel vormgever noar wul kieken?
Denne van Knöldert