Home / archiefcentraal / denne van knoldert eikel

denne van knoldert eikel

Ik had töt een wekke of twee terugge altied het idee det Geert Wilders in het openbaar altied ömgee’m werd döar bodybuilders en frequent sportschool bezukende dappere dodo’s. Mar toen ik die Lucassen een paar kear goed had kunn bekieken, begreep ik det het aanders was. Wilders hef gewoon zien mede-Kamerleden bie zich as e een stukkie buten op stroate wandelt.

Althans: d’r is niet völle verschil tussen de kaalkoppen die Wilders binnen en buten de Tweede Kamer vergezelt. In beide gevallen bent ze kaal geschöaren, breed gescholderd, zie bent blie det zo dicht bie Wilders meung stoane en zie hebt niet de behoefte zelf noa te denken. Zie hebt ze denk ik wel alle zesse op een rietie, mar ik heb altied de indruk det d’r toch ientie met de rugge noar het publiek stiet.

Nem die Lucassen, die schient bie de buren döar de brievenbusse hemm stoan te pissen. Ik heb mie det probearen vöar te stellen: Det iene heel neudig mut, niet wul wildplassen (want as ie doar vöar veroordeeld wördt kun ie de Twidde Kamer wel vergetten) en det ie dan een bittie öm oe hen goat kieken hoe ie det oplost. Dan zie ie de brievenbusse van de buurvrouw, doe ie de gulpe én de kleppe van de brievenbusse open, druk ie oe piemeltie noar binnen en loat ie de urine lekker lopen. Hè, det lucht op.

Ik stel mie dan de katte vöar die an de andere kaante lekker op de döarmatte lig. De hond, die altied anslöt as de brievenbusse klept. Of de buurvrouw natuurlijk, die eam in de gang mos weane en doar een piemeltie zut det löaglöpp. “Lucassen zeker wear”, denkt ze, pakt een neej pak koffie uut de vöarroadkaste en giet gewoon verder met woar e met bezig was. Dan stoa ie ‘r wel gek van te kieken as ie de buurman iniens in de Twidde Kamer ziet zitten. “He, is det niet die kale eikel die wel ‘ns bie oons in de brievenbusse stiet te zeiken? Zo in pak kiek ie d’r toch heel aans teeng an.”

Het schient det ze op de PVV-fractiekamer een bördtie hebt hangen met ‘Verboden vöar Marokkanen’ en det d’r noe iets onder mut kom as ‘en ok vöar ander schorriemorrie’. Zie zuukt nog noar de juuste formulearing. Hero Brinkman stellen vöar: ‘verboden vöar PVV’ers’. “Ben ie noe al wear dronken?” vreug Geert zich of en stellen tevreden vaste det zien partij nog gin democratie was. Want dan zol e nooit premier wönn van de democratie Nederland.

Denne van Knöldert

Lees ook

Inschrijving VechtdalTrail in Ommen geopend

OMMEN – Het was lang spannend, maar met de aangekondigde versoepelingen vanaf 30 juni lijkt …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.