Ik zatte mie net of te vroang hoe det vriejende stellegie in de trein zich zol gedraang as d’r iene teengoaver hun ging zitten , toen d’r op station Wieje ok inderdaad ientie ging zitten. Het meissje deud nog snel de blouse wat dichte, mar de neeje passagier had d’r gin oog vöar. Die was zo opgewonden, die had een verhaal te vertellen en det wol ze kwiet an de earsten de besten.
“Och, zo leuk… Ik had net de schoele van mien dochter an de lijn. Die is van de wekke vöar het earst noar groep iene egoane. En noe mag ze vriedag gelieke al met noar Walibi. Wat lief hè? Ja, ik zeg nog teeng de meester det ze haar dan wel goed in de gaten mut hoalen, want mien dochtertie hef heel vake det ze zo iniens weglöp. Ik heb al een paar kear ehad det ik haar dan niet wear kanne vinnen. Mar ja, as ze in Walibi is, hoef ik mie doar gin zörge oaver te maken. As ze doar weg löp is het de schuld van de schoele. Dus…”
Heel vöarzichtig halen de jongen zien haand onder de konte van het meissie vandan. De neeje passagier zag het niet. “Ja, leuk zo’n klein meisie. Bie het consultatiebureau zei’en ze vief joar terugge det zie wel 2.04 meter kon wönn en det wule d’r al mar vaste oaver noa mossen denken det ze an de hormonen mos. Want earder ongesteld is sneller uut de gruui. Mien man was d’r woedend op. ‘Det bepale wie zelf wel’, zei hij op het consultatiebureau. Mar doar hebt ze d’r noe al lange niks mear oaver te zeng. Dus…”
Ik dache nog, dan vind ze det meissie op den duur wel wear terugge in Walibi, as die 2.04 meter wördt valt det wel op.
De neeje passagier bleef döarratelen, as een kippe zonder kop, teeng meansen die ze niet kennen en die net nog zo hearlijk zaten te vriejen.
“Ik zol zelf ok zo lange wönn, mar zo iniens op vakantie in Duutsland was het zo verre. Ik sleupe boam en reup iniens noar beneden ‘Mamma, ik ben ongesteld. Mammmaaaa’. Mamma noar boam en inderdaad, tampon en det soart dinge. Zeg mien va bie het etten teeng mien moe: “dan hoef zie straks ok niet an de hormonen. Dus…”
Ik wusse in Deamter nie hoe snel ik de trein uut mosse komm.
Denne van Knöldert