Een derde van het CDA-congres was teeng saamwerking met de PVV en toch giet die partieje d’r met verder. Antwoard van Wilders: “ik heb niks met het CDA, ik heb niks met Koppejan, ik heb niks met Ferrier.”
Een derde teeng en toch döargoan. Det is as een derde van het huus in de fik stiet, en ie toch gewoon de voetbalwedstrijd op tillevisie uutblieft kieken. Of det de banden van de auto vöar een derde löag bent, mar det ie toch döar riedt. Det een derde van het politiekorps achter oe an zit en det ie dan denkt: och, twee derde dus niet. Det ie een derde van oe belastingschuld betaald hebt en het dan wel goed vindt. Ik doe in ’t vervolg niet mear dan ien derde van de ofwas. En met stofzuung ben ik völle sneller kloar, ik zuge allenig het twee derde deel in ‘t zicht.
Ik nemme teengwoardig völle mear boeken met uut de bibliotheek. Want as ik twee derde deel eleazen hebbe hoef ik nie wieder. Det leste deel dut d’r toch niet toe. Vöarige wekke met volleyballen heb ik alle sets verlöaren. Mar bie analyse stund ik op twee derde deel van de meeste sets nog gewoon vöar, dus ik heb de wedstrijd ewunn.
Ik ben werkgever en werknemer. As werkgever ben ik disse moand begunn met het uutbetalen van slechts twee derde van het salaris. Det andere derde deel dut d’r nie toe. Ik hoppe trouwens nie det mien werkgever ok zo rederneert, det die d’r niks met hef, gin bruggenbouwer is.
Was de conducteur lest kwoad op mie. As ik noar Roalte wolle, mos ik nie steeds vanuut Zwolle een kaartie kopen töt in Heino. “Mar menear de conducteur”, heb ik hem uutlegd, “Heino lig op twee derde deel van Zwolle noar Roalte. Hij zeg: “dan is Heino ook goed genog, dan stap ie doar d’r ok mar uut. Doe mar of Heino Roalte is.” En feitelijk had die man we geliek. As ie in Heino bent, ben ie eigenlijk ok wel in Roalte. Heino hef gin clubhuus, Heino ís een clubhuus. Van Roalte. Mar ik ben gin bruggenbouwer, det hebt ule wel döar, ik heb doar niks mee.
En lest kwam ik een moslim teeng. Prima kerel, nooit wat met te doene. Ik heb hem toch vöar een derde töt op het bot beledigd. Niemand die d’r wat van zei.
Denne van Knöldert