Home / archiefcentraal / denne van knoldert sorry

denne van knoldert sorry

Ik höaren op de autoradio det het gevoarlijk is te bellen of de TomTom in te stellen as ie al riedt. Tegelieke reed d’r zo’n neeje blauwe busse langs met ‘buiten dienst, sorry’. Det van buten dienst stund op ien venster, toen det wegvloepen, las ik ‘sorry’.

Ik weet niet wat mie op det moment het meest ofleiden, de autoradio of het woard ‘sorry’. Hoezo sorry? Sorry van wie? Sorry an wie? Ik kreeg van de wekke ok een brief van de Rabobanke, det ik in de toekomst vöar een rekkening ‘helaas’ geld mosse goan betalen. Hoezo ‘helaas’. Hillemoal niet helaas, vöar hullie tenminsten niet. Zie hebt gewoon wear een neeje maniere evunn öm geld an mie te verdienen. ‘Helaas’? ‘Lekker puh’ zollen ze bedoelen.

‘Sorry, ik ben buten dienst’, zei die busse. Mar de chauffeur was vaste hillemoal niet van ‘sorry’. Die was al lange blie det e niet van die etterbakkies – noazaten van Wilders stemmende olders – achter in de busse had zitten. Hij was lekker buten dienst op weg van A noar B en wat A en B waren, det ging toevallig hillemoal niemand wat an.

Het scheut ollemoal döar mien kop terwijl ze op de radio uutleng det ik better de oamd van te vöaren mien TomTom kon instellen zodet ik op de reisdag zelf met mien gedachten op de weg konne bliem.

Ik hoale mie niet zo an die adviezen. De tillefoon heb ik vake gewoon in mien hand, behalve in de buurt van rotondes, want doar stiet wel ‘ns een politie achter. De oamd van te vöaren kiek ik inderdaad wel hoe ik mutte riene mar bie gebrek an een TomTom print ik de route uut en die plak ik op mien stuur. Onderweg leas ik gerust een rapport det ik in de vergadering van straks neudig hebbe. Af en toe zie ik dan een vrachtwaang in de achteruutkiekspiegel die ik kort doarvöar nog vöar mie hadde. Bliekbaar werkt de automatische piloot prima.

De neeje programmearing van Radio 1, die is volgens mie völle gevoarlijker dan bellen achter het stuur. Presentatoaren Sven Kokkelman en Jan Mom sprekt mie toe asof ik infantiel, nee debiel benne. Zie zöart wat mee met de politie en een reclamecampagne oaver veilig auto riene, mar vroagt niet noar de echte risico’s op de weg as hard remmen wegens een snelheidscontrole.

Die neeje Syntus-bussen met die verspringende letters oaver plaats van ankomst, die bent gevoarlijk. Sorry, det ik het zegge.

Denne van Knöldert

Lees ook

BurgerBelangen wil snel extra seniorenwoningen bij Wooldhuis

HEINO – Maak snelheid met het bouwen van extra seniorenwoningen bij Het Wooldhuis. Deze oproep …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.