Home / archiefcentraal / denne van knoldert mobiel internet

denne van knoldert mobiel internet

Internet deud het niet mear op mien mobiel. En ik had mie d’r nog zo op verheugd. Auto de döare uut, met de trein noar het werk, mooi internetten. Ik heb d’r alles an en doane öm het euvel te verhelpen. Bienoa alles, want het lukken nie, tut die iene tip die mie regelrecht noar het succes leidden.

Ik hadde ze d’r bie mie op het werk al bienoa de schuld van egeem. “Sinds wule een neej droadloos systeem hebt, dut internet het niet mear!” zei ik teeng de ICT-man, mar toen die vreug of ik dan toevallig de wifi verkeard had in esteld, had ik d’r al snel niet mear van terugge. De man pakken mien tillefoon, vleug van links noar rechts döar de menu’s (ik heb altied twee wekken neudig as ik een aander toestel kriege, hij was d’r binnen twee seconden op thuus), vinken wat an en wear en uut en concludearen toen: niks mis mee, lig niet an oons.

T Mobile ebeld. Earst dree minuten keuzemenu’s döarwandelen en toen kreeg ik een jong dearntie an de lijn die d’r niks van wus, mar wel van een scherm of kon leazen wat de vollende vroage an mie zol weane. Uuteindelijk wönn ik met de digitale helpdesk toestelhulp.t-mobile of escheept woarnoa ze vriendelijk vreug of ik nog mear wensen hadde. Of zie vanoamd nog wat te doene had, probearen ik, mar doar kreeg ik gin reactie op. Zie wensen mie nog een goeie middag, terwijl het nog mar 09.00 uur in de monn was. Had de computer det noe verkeard vöar ezegd? Of zie ok een bittie in de warre!

Intussen was ik al twee wekken treinreizen verder en was Spits en Metro inmiddels mear dan zat. Foei wat een bagger. Alles uut die dagelijkse geschiedenisbuukies wus ik al wel. Allenig de Sudoku was wel leuk, mar det kan ik ok op mien mobiel, zelfs zonder internet. Iedere kear as ik d’r an dache die toestelhulp te gebruken, was d’r gin aandere computer in de buurte dan allenig mien mobiel. En doarmet kon ik nie op internet…

Zojuust ben ik toch an het prutsen e goane. Toen ik op toestelhulp eindelijk mien type tillefoon bie het merk evunn hadde was de earste opmerking det het niet an de instellingen kon ling, det had de fabriek al goed endoane en doar hoe’m ik niks an te veranderen, sterker nog, doar kon ik niks an veranderen. Tip twee was: zet de tillefoon een kear uut en dan wear an.

En noe heb ik dus wear internet…

Denne van Knöldert

Lees ook

Nomineren voor Goudhaentje weer mogelijk

RAALTE – Inwoners van de gemeente Raalte kunnen weer initiatieven of projecten nomineren voor een …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.