“Hoe oald ben ie al hillemoal”, vreung ze mie lest op een verjoardag toen ik doar mien mening uutsprakke oaver de jeugd die in het weekend töt ’s mons vrog in de disco hangt, oaverdag met de konte in bedde lig en tussendöar allerlei biebaanties hef öm dure dingen te kopen die ze niet neudig hebt.
Hoe oald ik wasse. Ik hebbe doar ‘ns goed oaver noa edacht en mie vöar enömm mie niet van de wies te loaten brengen. Ik was en benne d’r van oavertuugd det mien zienswijze zo slecht nog niet is. Het is onzin töt half veare noar de disco te goane. Gewoon onzin! Want d’r is gin enkel vöardeel an det late tiedsitp en gin enkel noadeel an een vrogger tiedstip. Mar aandersömme wel. Noadeel van late noar de disco is det ie in het weekend gin vriewilligerswerk bie de sportclub kunt doene, vöar de rest van de familie het dagleam verziekt met een chagrijnige kop en op moandag op schoele nog nie wakker bent. Woarmee de vöardelen ok grotendeels al enuumd bent. Doar kump het geruste gemoed van de oale luu bie die zich niet hoeft of te vroang woar eans in Salland de wichter wear wat an het slopen bent.
Mie zul ie dus op verjoardage niet een aander standpunt höaren innemmen. Ok niet oaver biebaantjes. Kinders van 14, 15 en 16 joar loopt in het weekend niet op de sportvelden, mar pakt supermarktschappen vol, helpt de boer bie de fruitoogst, brengt de kraante rond, bedient in restaurants, stoat auto’s te wassen, doet oe benzine in de tank. Wrum? Ömdet ze geld wult verdienen. Woarvöar? Vöar een dure tillefoon, een scooter of klearen uut een stad terwijl ie ze hier ok kunt kopen. De generatie van noe gruuit dus eigenlijk op met de gedachte det ze hard mut werken öm geld te verdienen vöar dinge die ze niet neudig hebt. De’s dom, det hebt wule ze dan niet goed bie ebracht, as oalders niet, op schoele niet. Want hoe simpel kan het weane: as ie die dure dinge niet hoeft, hoef ie ok niet te werken en hoal ie tied oaver vöar leuke dinge te doene.
Toen was ik lest op een oalderoamd van het Carmelcollege. Doar sprak de directeur. En die zei precies wat ik dache. En zie deed d’r een scheppie bie boam op: “met zo’n leamsstijl van werken en ’s nachts uut goane, goat de learprestaties keihard achteruut.”
Ik denke det ik noe wel wear bieval kriege op de verjoardag.
Denne van Knöldert