Home / archiefcentraal / denne van knoldert bekoard

denne van knoldert bekoard

D’r is in het land een rage op komst öm onder beköaringen uut te komm. Het rapport opvroang van de laatste ijking van de lasergun. Onderzuken of de videowagen wel döar de APK ekomm is. Achterhalen of de betreffende agent op tied noar de biescholing is ewest.

Noe zul ie oe ofvroang wat det vöar nut hef. Nou, as de politie niet kan bewiezen det de lasergun goed of esteld is, dan mag ik d’r van uut goane det d’r een kans is det e niet goed of esteld is. Een auto die de APK niet döarstoane hef, mag nie op de weg komm, en kan mie dus niet achtervolgen. Een agent die niet bie eschoold is… tja, woar is die ollemoal wel niet toe in stoat.

Beköarde meansen die van det soart dinge werk maakt, die mag ik wel. Een bittie burgerlijk ongehoorzaam weane is een groot goed. Het hölt iederiene scherp. En in dit geval schelt het ok nog iens beköaringen. Want het blik heel völle tied te kosten al det soart dinge an te tonen. Dan kun ie better de beköaring seponearen, zoals det zo mooi heet, dan det ie an de verzoeken tegemoet komt.

Intussen is de politie al die gegevens an het automatisearen. Dan kan de klager zelf op internet onderzuken of de beköarder an alle regels voldeud. Net as de bewiesfoto van döar rood riene. Die kun ie op estuurd krieng. In Den Haag hef een kunstenaar doar een project van emaakt. Zet ze oe achterstevöaren achter op een Cabriolet met links en rechts topless meiden. Dan riedt ze döar rood en krieg ie de foto toe estuurd…

Ie hebt ok meansen die teeng bent. Die zegt det ie de maatschappij niet mag belasten met det soart gedrag. Mar wie begint d’r dan? De regelgevers zelf toch? Ik heb de kabinetsvorming met stijgende verbazing bekeken. Degene die zeg wat d’r an de hand is (Klink) krig de Zwarte Piet. Terwijl meansen die de boel in het honderd loat lopen (Wilders en Verhagen) allenig mar bezig bent hun eigen hachie te redden vöar een vervolgcarrière in de politiek.

Ik heb kons een beköaring ekreeng vöar bellen in de auto. Oom agent schreef gin bonne uut, mar maken notities op een kladblökkie öm ze later uut te werken an het bureau. De beköaring heb ik nog nie. Mar as die kump goa ik ‘m anvechten. Want zo kan iedere agent an het bureau wel beköaringen goan schriem.

Denne van Knöldert.

Lees ook

Terras Veldhoek blijft dicht na deal met burgemeester

HEINO – Horecaondernemer Wilco van Dam ziet af van de opening van het terras van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.