Home / archiefcentraal / denne van knoldert vieftig

denne van knoldert vieftig

Nog vief joar, en ik mag met korting deelnemm an een heleboel moois wat dit leam oons biedt. 55-plussers kriegt namelijk al op behoarlijk wat zaken leaftiedsvöardeel. ‘Terecht’ dach ik vrogger altied. ‘Det oale volk mag best wat extra steun hemm’. Mar noe ik al oarig die kaante op goa – vandag ben ik 50 ewönn – lik het mie mear discriminatie. Ik heb niet het idee al bienoa toe te weane an een vakantiebeurs vöar 55-plussers.

Vieftig. Op mien werk zegt ze ‘vroag het Denne mar’ as het öm zaken giet die al wat langer op de rit stoat. ‘Die weet die dinge van vrogger nog wel’. En het kabinet in de maak mut bestoan uut een neeje generatie ministers. Veartigers. Ik hoppe oald te wönn, mar det mut dan denk ik geböaren met hobby’s as vissen en voetbal kieken. Het leam vanof de kantlijn bekieken en in het geval van vissen dus ok nog niet iens met de intentie van een stuurman an wal.

Gelukkig heb ik mie wat kippen ekreeng met de verjoardag. Een köppeltie van tien kippen en een hane. Det gif mie in de schaduw van een mooie zommerdag völle kiekplezier vanuut een lekkere schommelstoel. Ik begriepe noe hoe ‘haantje de voorste’ bedacht is. Det beest löp parmantig vöar zien kippeties uut op zuuk noar etten en veiligheid. ‘Pikorde’ snap ik noe ok. De kippe die het hardst öm zich hen pikt mag het korst bie de hane lopen. En met de kippen op stok? Ok doar begin ik an met te doene. Knevel en Van de Brink bint mie zo toe vandan te late op de oamd.

Ien hane, tien kippen, as ik det zo bekieke geleuf ik niet det mien hane al vieftig is. Det beest lust d’r wel pap van. Die weet wel woar Abraham de mosterd vandan haalt.

Kippen hoalen is trouwens nog wel een mulijk vak. De earste twee köppelties bent op egoane an vos, bunzing en buizerd. Die hebt d’r de ofgelopen winter lekker etten an ehad. Mos ik det disse kear vöarkomm met een renne? Het zol allenig mar helpen as ik mie een kippenrenne bouwen met ok an de boamkaante gaas en det wönn mie te gek. Bie de bouwmarkt rekken ze mie vöar wat zo’n hok zol kossen.

De eindconclusie was det ik völle better af en toe een neeje kippe konne kopen.

Denne van Knöldert

Lees ook

Repair Café in Dorpshuus

HEINO – Op zaterdag 30 oktober vindt er een Repair Café plaats in het Dorpshuus …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.