Een student uut Groningen is op epakt ömdet e met een ontgroening een aandere student in de fik e stökken had. Het slachtoffer redden zich döar in het water te springen. Veertig uur later is e noar de dokter egoane, die ‘m döarsturen noar het brandwondencentrum. Hij wol zelf gin angifte doene teeng de barbaar, toen hebt zien oale luu het mar e doane.
Een student uut Amsterdam had tijdens een drinkfeest het zangbuukie noa een liedtie niet dichtgeslagen links noast zich near elegd en kreeg döarum in handstand (aanderen heulen ‘m an de biene ömhoge) een glas bier in zien mond egötten.
Wannear kump d’r noe ‘ns kear een eind an die ontgroeningen?
Ik denk det det soort Hitlerjugend-praktijken pas ophoalt as niemand zich mear anmeldt. ‘Stel: d’r is oarlog en niemand giet d’r noar toe’, zeg Loesje. Zo mut det hier ok weane.
Mar al die neeje studenten blieft goane. Bange det ze d’r aans nie tussenkomt. Bange det ze aanders verderop in het leam gin netwerken kunt opbouwen. Volk woar ie later wat an hebt hef de instelling det ze ok wel zonder det soart rituelen an vrienden en netwerken komt. En ik wul het earste netwerk wel oprichten woar het verboden is vöar meansen die bie een studievereniging hebt ezeten.
En al die oale studenten blieft de neejkommers vernederen. Zie nemt wraak op wat ze het joar doarvöar an e doane is. En as ze ien kear de macht hebt, goat ze te verre. Bekend onderzuuk löt meansen de zwoarte van een stroomstoom bepalen an iemand die niet iens zo völle verkeard e doane zol hemm. Héél völle meansen geeft dan gerust zo völle stroom det de persoon in kwestie geëlektrocuteerd zol wönn. Die broenhemden van een ontgroeningsleiders hebt doar ok last van. Zie stekt aanderen in de fik…
E n dan is d’r ok nog het thuusfront van oalders die trots op hun kinderen bent en dan zegt det in de Stentor stund det die Groningse student zelf met het braandtie inestemd had. Noe is wat d’r in de Stentor stiet wel vaker leugenachtig, mar ok al was het woar, dan is het een slap excuus. Die oalders mut nie trots weane, mar bezörgd. Is hun jochie of meissie toch een meeloper ewönn en lött e zich vernederen öm d’r bie te höaren.
En later komt die jochies en meissies op sleutelposities in de maatschappij. Machtige meansen die d’r lol in hebt aanderen te vernederen.
Denne van Knöldert