Home / archiefcentraal / denne van knoldert vakantiespanning 5

denne van knoldert vakantiespanning 5

As ik een vrogge ofspraak hebbe woarvöar de wekker op een aandere tied dan gebrukelijk inesteld mut wönn, sloap ik de hele nacht onrustig. Ik twiefel steeds of ik de wekker wel goed ezet hebbe en ben bange det ik döar de wekker hen sloape. Meestentieds kom ik dan teeng de ochtend goed in sloap. En dan giet de wekker.

Op een vakantie noar Zuud Spanje hef de reiswekker mie de hen- en terugweg dwars ezetten. Volgens het vaste patroon had ik de nacht slecht esloapen en was ik verre weg toen de wekker mie uuteindelijk wakker maken. Probleem was det ik de wekker te late had e zet. Of eigenlijk: ik had de reistied noar het vliegveld verkeard ineschat.

Terugge van Spanje dach ik ruum de tied te hemm. Mar kort vöar het vliegveld waren ze met de weg bezig. En dus stunn wule in de file terwijl wie het iene noar het aandere vliegtuug oaver oons hoofd op zagen stijgen. De file bleek te komm van een wegwerker die in zien ientie met een bessem wat langs de kaante stund te veang. Had e de vierbaansweg half vöar of ezet. Wie haan nog vief minuten spölling toen wie inchecken.

De henweg was het mien eigen schuld det het krap an was. “Salland – Schiphol? Een uur!” had ik het thuusfront vöarspeld. Noa, met 160 kilometer an het uur lukken det nog niet. Bie de incheckbalie stund een mevrouw al onrustig te wachten: “Ule bent de laatsten” reup ze, zie halen oonze vliegtickets langs een scan en zei “ren mar met”. Gin paspoartcontrole of niks e zene, gewoon kruip door sluip door noar de ‘gate’ woar ze de boel al an het ofsluten waren. “Disse luu mut ok nog met”, reup oonze redster in nood “en kan ik nog een stoel vöar lange meansen krieg?” reup ik d’r achteran? Ie geleuft het of niet, mar zelfs det kon nog…

Bie anvang van een aandere vakantie vun ik det mien wekker een heel vreemd geluud maken. Het leek de vöardöarbelle wel. Bleek mien moat vöar de döare te stoan. Hij zol oons noar Schiphol brengen. Ik heb snel de döare lös edoane en de rest van de familie wakker emaakt. Pas toen ik de sloap goed uut de oong had ewreem begreep ik wat d’r fout egoane was. Ik had de wekkerradio op Hilversum Drie stoane, en in die tied haan die ’s nachts gin uutzending.

Denne van Knöldert

Lees ook

Rick Evers: Wit rood wit

Ik heb het virus. Het is niet anders. Opgelopen tijdens Ajax tegen Cambuur Leeuwarden in …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.