Home / archiefcentraal / denne van knoldert vakantiespanning 4

denne van knoldert vakantiespanning 4

Het giet mie disse zommer oaver spannende vakantieverhalen. As stukkiesschriever vind ik het ieder joar roazend spannend met wulke verhalen luu van de kraante de zommer döar komt. Döar het joar hen hebt ze al muuite de pagina’s met woarheid te vullen, en dan geböart d’r in de zommer eigenlijk ok nog een kear heel weinig. Komkommerneejs heet det, ömdet in disse tied de komkommers het beste gruuit. Zie gruuit net zo hard as een verzunnen verhaal.

Nem dissent, uut de Volkskrante van een paar joar terugge. In Schotland hef een schoap bedacht det e de wildreusters rondom zien weiland kon ontlopen, döar d’r oaver hen te rollen. Het beest kwaamp zo an de aandere kaante van het reuster. En ie weet wat d’r met schoapen geböart, as d’r ientie oaver het wildrooster rolt, volgt d’r mear.

Ik stellen mie de behoefte van het schoap vöar. An de aandere kaante van het reuster is het grös vermoedelijk völle gruuner. Mar hoe kwaamp e doar? Rollend dus. Ik stellen mie ok de journalist vöar die het verhaal via het ANP binnenkreeg: “Mu-j kiekn wat ik hier leaze. Mooi verhaal. Belangrijke plaatse geem in de kraante.” En ik stellen mie de lokale kroeg vöar woar ze het verhaal bedacht haan. Wat zöaren met aandere meansen uut het dorp. Lekkere pulle bier d’r bie. En dan kump d’r zo’n vakantieganger binnen die probeart in contact te komm met de plaatselijke bevolking. Och, dan is het mar eam en hie hebt zo’n rollend schoap bedacht.

Bleek die vakantieganger een journalist die een wekke later wear mos werken, in de komkommertied. Noa, dan giet zo’n verhaal snel de hele wereld oaver.

Wat mie dan nog het mooiste lik is, as ie dan anderhalve wekke later wear met mekare in de kroeg zit, de kraante d’r bie pakt en dan least oaver de schoapen van boer McJansen bie oe uut het dorp, die rollend oaver wildroosters op zuuk goat noar gruun grös.

Een goeie wekke later stund d’r een bericht in de Volkskrant det het verhaal niet woar was. Het was een klein verhaaltie. Op een wat onopvallend plekkie. En det neejs hef de kraante in Schotland nooit ehaald.

Doar in Schotland zint ze op neeje verhalen. Iets oaver schoapen die as ze ömmevalt en op de rugge terechte komt, det ze dan niet van zich zelf mear op de biene kunt komm.

Denne van Knöldert

Lees ook

Rick Evers: Chinese giraffen

Ik heb twee giraffen besteld. Heerlijk trouwens dat meervoud. Giraffen. Dan weet je zeker dat …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.