Home / archiefcentraal / denne van knoldert vakantiespanning 2

denne van knoldert vakantiespanning 2

Disse vakantietied stoa ik stille bie spannende vöarvallen die ik in het verleden met emaakt hebbe op vakantie. Want een vakantie heet ontspannen te weane, mar wie weet ollemoal det det soms heel aans is. Ie hebt een goeje relatie as die vakantiebestendig is, zegt ze wel.

Ik vund het vöarig joar merakels spannend toen ik ien van de wichter weg brache vöar een vakantie op een jongerencamping. Ik dreiën de anhanger een veld op woarbie ik nie uut mosse kieken vöar tentharingen, mar vöar kratten bier. De nieuwe buren werden niet eköard op ‘zollen ze zich ’s nachts wel rustig hoalen’ mar mear op ‘ziet ze d’r goed uut?’

Ik heb mar net edoane of ik het ollemoal de normaalste zaak van de wereld vunne, heb de campingpoalen nog eam met helpen selecteren en was toen al niet mear neudig, eigenlijk niet mear welkom.

“Nou, noe redde wie oons wel.”

“Mut ik nog niet eam de benzinebrander uutleng?”

“Ik zeg toch, wie red oons wel?” klunk het al wat dwingender.

Dus trappen ik het mar wear an. In mien ientie terugge van Zeeland wear terugge noar Salland. De ofrit van de camping ging langs de vuilnishoek. D’r laang ollemoal kapotte tenten. “Och, as de jongeluu een wekke in zo’n tente hebt e leafd hier, dan kun ie zo’n tente wel weggooien”, brach een verkearsregelaar mie nog een kear wear in twiefel of ik de wichter hier eigenlijk wel echt achter wolle loaten. De verkearsregelaar had gin tied vöar mear tekst en uutleg. Tut an de zeeduinen an toe stund een grote file met volk det de camping nog op mos. “’t Is wisseldag vandage. Het iene volk giet vot, de andere groep kump vandage.”

Met een ongerust hart dreien ik de weg noar huus wear op. Eam diep adem halen. Een slok water nemm en gas mar wear.

Onderweg heb ik mien hartslag uuteindelijk wel wear op normaal kunn krieng. Det lukken mie döar terugge te denken an mien eigen earste vakantie. Ok weg ebracht döar mien oale luu. Ok een wekke in een bungalowtente. En met buren die zich leuten vergelieken met de buren van woar ik de wichter net achter eloaten hadde. Buren die een schutting bouwden met bierkratten. Die vakantie is het ollemoal goed ekomm met mie. Ik kwam d’r zelfs achter det een wekke niet etten, mar wel bier drinken, heel goed is teeng acne.

Gerustgesteld zetten ik mie een mooie cd op in de auto. Ik wasse nog gin uur onderweg toen mien mobiel ging. Hoe de benzinebrander werken…

Denne van Knöldert

Lees ook

Blog Aaltje Booijink-Jonkman: Wees zuinig met energie!

Ken je de kreet nog? In de jaren 70 werd opgeroepen om verstandig en zuinig …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.