Home / archiefcentraal / denne van knoldert vakantiespanning 1

denne van knoldert vakantiespanning 1

Spannende verhalen had ik ule beloafd disse vakantieperiode, dus heb ik dit weekend de reisverhalen van welear op mien gemak nog iens döar eleazen.

In Turkije zaten wie in de nachtbusse van Pamukkale noar Instanbul. Lekker achterin probearen wat weg te dommelen. Want as nacht, reizen en sloapen saams goat, hoal ie oaverdag volle tied oaver. Ik was nog mar ien kear wakker eschrukken ömdet mien hoofd van mien romp dreigen of te rollen, toen het van ‘boem’ ging. Een vrachtwaang reed achter op oonze busse.

Gelukkig ging het niet hard, det in teengstelling tut eam later. Want de chauffeur van de vrachtwaang kwam verhaal halen. Ik geleuve det hij de buschauffeur d’r van beschuldigen det hij te plotseling eremd had. Mar het gebaar van de voeste op de vlakke hand kon ok inhoalen det hij d’r wel zinne an had iene een klap vöar de bek te geem.

Hoe dan ok, as een soart van verbroedering ging al het busvolk achter zien chauffeur stoane, zelfs de Koerd die meereizen wönn iniens geaccepteard as ‘iene van oons’. Tja, doar stund die vrachtwaangman dus, hillemoal allenig teengoaver een halve busse vol kwoaje kjels. De andere helft, het vrouwvolk en twee toeristen (mien vrouw en ikke) zaten van achter het glas met te kieken.

Of het noe zien eigen mes was of det van iene bie oons in de busse weet ik niet, mar het was een mes. En det ging in het boambien van de chauffeur. Die veul – creperend van de piene – op de grond. Ik dach earst nog an een echte Machlas, de vedette van Vitesse die beroemd werd öm zien fopduken. Mar Machlas is een Griek en die chauffeur was Turk. En disse Turk spöllen gin toneel. Hij had echte piene.

Woar ze vandan kwamen weet ik niet, mar de tuut ta tuut was d’r ok iniens en eam later reden wie in colonne noar een politiebureau. Doar wönn verdachten in een klein bureau verhöard. Ik weet det zo precies ömdat mien vrouw en ik as toeristen uut de busse haald wönn en wegens gebrek an mear kamers, gewoon bie de verhöaren in een huukie met zaten te kieken. Toen de politie d’r ientie oaver toafel trök en een klap in het gezichte gaf ömdet e gin antwoard wol geem, scheut mien vrouw in de lach…

Gelukkig wönn wie eam later opehaald en an de snelweg op de earste de beste busse richting Istanbul ezet.

Denne van Knöldert

Lees ook

Wiegeliedjes en nachtmerries in Nicolaaskerk

WIJHE – Sinje Kiel en David van Ooijen verzorgen op zaterdag 7 augustus een concert …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.