Home / archiefcentraal / denne van knoldert spannende vakantie

denne van knoldert spannende vakantie

Goed gebruuk: Denne giet op vakantie. Volgende wekke goa ik vot en ie ziet mie niet wear vöardet het Stöppelhaene is. Mar ie blieft wel van mie höaren, want ik deel mien vakantie-ervaringen graag met de thuusblievers. Det die het gevuul hebt van ‘gelukkig det wie niet vot bent e goane dit joar’.

Ik had vöar disse zommer bedacht det ik korhoenders zol goan tellen op de Sallandse Heuvelrug. Want ik hoal van rustige vakanties. Bittie in de hei op mien konte zitten met een verrekieker wat rondloeren. Prachtig toch? Want met een verrekieker – zo stel ik mie det vöar – zie ie völle mear dan allenig mar korhoeners. In mien studententied schreef ik al iens een openingsnummer vöar een cabaretoptreden met de versregels ‘’t is lente, ’t is lente, de bloemetjes en de bij, ’t is lente, ’t is lente, lekker neuken op de hei’. Det was toen begin joaren tachtig een daverend succes (die versregels) vanwege het schokerende woardgebruuk, noe schrif de earste de beste columnist het gewoon in zien teksten.

Ik zag mie dus wel zuken noar de korhoen. Mar noe las ik van de wekke det die hele korhoen niet mear op de Sallandse Heuvelrug te vinden is. Tja, dan giet de lol d’r dus wel of. Snel aandere vakantieplannen bedenken. De eikenprocessierups spotten? Ok gin uutdaging mear, want met het warme wear kröp det beessie van boam uut de boom noar kort an de grond en dan kom ie ze dus völ te makkelijk teeng. Vakantie mut ok nog ietswat spanning in zich hemm.

Ik heb d’r ok nog eam an e dacht noar het examenfeest te goane van ien van die jongens die mie het ijs uut het rustpunt gapt. Gewoon noar toe goane, vöarstellen an de olders (“ik ben die man van het rustpunt woar oe zunne ijs uut gapt”) en dan de kas gappen woar as of alle bezukers hun entreegeld instopt. Wel spannend, mar het is völle mooier de daders nog een zommer lang te loaten bungelen. Det is pas een spannende vakantie (vöar die gappers).

Echt spannend zol het weane noar Bagdad op vakantie te goane. ’s Monns vrog bie opgoande zunne op een drukke markt lekker vers fruit halen. ’t Is een uutdaging, mar net wat te risicovol. Beheersbaar spannend is een volle markt met Stöppelhaene. Sprekker weane met het oogstcorso… Det lik mie wel wat. As ik doar disse vakantie mien pijlen noe iens op richt.

Denne van Knöldert

Lees ook

Rick Evers: Nectarinebewaarplek

Natuurlijk weet ik heus wel dat er grotere problemen op de wereld zijn dan mijn …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.