Ik rede lest achter een oale man an en vunn det die van die alderjezus grote oaren had. Zó groot, det zie ie feitelijk alleig mar bie oale meansen. Zol det de evolutie weane, vreug ik mie of? Zollen ze vrogger met grotere oaren emaakt wönn? En wrum is det bie het jongere volk niet mear an de hand.
Misschien – bedach ik mie achter die oale man anfietsend – zol het te maken kunn hemm met de ontwikkeling van de koptillefoon. Vrogger haa’n ze doar van die heel grote schelpen anzitten vöar oaver de oaren. Langzaam mar zeker wönn die ‘oarwarmers’ kleiner. Wol ie van de koptillefoon kunn bliem genieten, dan kon het niet aans of wule mossen döar-evoluearen noar kleinere oaren…
Tja, ie bedenkt wat op de fietse. Mar ik kwaamp dan ok net uut zo’n zöarvergadering woar het niet uutmaken wat ik te berde hadde te brengen, want de vöarzitter ging toch zien eigen gang. Echt zo’n vöarzitter die grotere oaren neudig had, öm better te kunn lusteren.
Better höaren, doar konn die grotere oaren natuurlijk ok met te maken hemm. Wule kunt de geluden öm oons hen teengwoardig völle harder zetten, dus wie hebt niet mear van de grote oaren neudig.
Mar ok det argument is d’r niet echt iene van det ie denkt ‘zo zal God het wel bedoeld hemm met het döarontwikkelen van de mens’. Mar ik vulen det ik dichter bie de woarheid kwame. die mie brach bie het woaröm van de grote oaren van de oale grieze eminentie die vöar mie fietsen. Misschien hebt oale luu zulke grote oaren ömdet ze dan op oaldere leaftied nog goed kunt höaren?
Daags doarna was op de radio een onderzoek oaver oaren en de oarschelp. Die schient zo ebouwd te weane det het geluud het meest optimaal noar binnen echoot, wie kunt d’r richting en ofstand met bepalen. De hersenen past zich vöar ieder mens specifiek an op de oaren, want niet ieder meanse hef dezelfde oaren. En zie haan ok uut evunn – wat vöar mien fietstocht wel belangrijk was – det oaren een leam lang ieder joar een millimeter döargruuit.
De onderzuker waarschuwen teeng een operatie an flapoaren. Det zet oe höargewoonte op de kop. Ik zie mear op teeng die millimeter per joar d’r bie. Ik hebbe nog zo’n dertig joar te goane, det is drie centimeter oar d’r bie. En de praktijk leart det het gehöar d’r niks better op wördt…
Denne van Knöldert