Home / archiefcentraal / denne van knoldert gappen uut rustpunt

denne van knoldert gappen uut rustpunt

“Wat mooi det det nog kan”, haa’n twee bezukers van oons rustpunt op een briefie eschreem. Diezelfde dag bemerken wie det d’r acht ijssies uut de diepvries egapt waren. Dus het was wel mooi, mar het kon niet.

Ik lope d’r noe al een wekke oaver noa te denken wat ik d’r met mutte. Zal ik wraak nemm op de daders (die daags doarnoa bleem toeslane)? Zal ik de politie bellen? Zal ik het rustpunt dichte doene?

De leste optie valt of. Ik heb het rustpunt namelijk zelf in mekare etimmerd (“mooie plekke, alleen det hok had wel wat mooier gekund”, schreef een bezuker). Allenig al vanwege de getrooste muuite, doe ik ‘m niet dichte. Doarbie, doede wie tientallen bezukers elke dag een groot plezier met een köppie koffie bie oons in het weiland.

Blif de twiefel tussen wraak nemm en de politie bellen. Het kan allebeide. Want ik weet wie het bent. Jochies uut Heino. Ik zie ze wel anleng as ze uut schoele komt. Mar van huus noar het rustpunt is 200 meter dus ben ik kansloos as ik d’r noar toe zolle rennen, de uut te lachen oale man. Mar de politie bellen wul ik niet. Ik heb gin vertrouwen in hun systeem. Pettemans zal wel wear ien of andere smoes hemm van ‘tja, ie mut ze op heterdaad’ of zo. En wraak nemm, vuult ok niet goed. Want wat kunt die jochies d’r an doene. Die hebt vermoedelijk een slechte opvoeding ehad van PVV-stemmende olders die gin idee hebt det hun eigen blanke noageslacht het rapalje van de maatschappij is.

Dus ik heb keurig een brief op de diepvries eplakt det ik donders goed wete wie de dieven bent en det ze een wekke de kans kriegt te betalen en det ik aans noar de politie én noar hun olders goa. Het zal de dieven in elk geval het ijs doen ömmedreijen in de mage en as ze niet betaalt, zult ze hun hele leam bie ieder ijssie det ze et, an het gestolen ijs denken. Het is dus noe betalen of nooit mear lekker ijs etten.

Tja, det klinkt dan toch ok wel wear as wraak. Of kan ik die handelswieze wegzetten as opvoeding. Det leste doe ik denk ik mar. Niet gelieke keihard anpakken, d’r op wiezen det gappen niet mag, een kans tut inkear gee’m, anzeten töt noadenken en hoppen op gedragsverandering van blievende aard.

Mar gelukkig is het binnenkort vakantie. Dan kump die schooljeugd niet mear langs.

Denne van Knöldert

Lees ook

Wegmetdyslexie opent deuren in Heino

HEINO – Ron van der Horst en Corien Eijhuisen hebben op 1 juni hun eigen …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.