Home / archiefcentraal / denne van knoldert ruben

denne van knoldert ruben

De Telegraaf was in de oarlog ok al fout. Mear wul ik oaver die kraante niet kwiet. Mar oaver het vliegtuugongeluk wul ik het nog wel eam hemm. Det Jan Smeekens twee wekken earder in det vliegtuug zat, tjonge jonge. Det d’r zestig, nee 61, nee toch nie, 62, 1 april 70 Nederlanders in det vliegtuug zaten. Foei toch.

In Enschede haan ze wear pech. Toen tien joar terugge De Roombeek ontploffen zund de nationale tillevisie het songfestival uut. Det wollen ze toch earst eam noar een goed eind breng, vöar ze oaverschakelden noar de vuurwerkramp. En noe det rotvliegtuug wear.

Jack de Vries, die kwam het ongeluk wel goed uut. Slecht nieuws mut ie verstoppen, zeg hij zelf, dus sleup hij tiedelijk in een kazerne (gescheiden van vrouw en vriendin, handjes boam de dekkens), wachtend op slecht neejs. Met twee dage stoeken det vliegtuug an de grond. De Vries is gewetenloos genog öm det as een geschenk uut te hemel te ziene, een mooi moment öm onopvallend uut de politiek te stappen.

In de beelden van het ongeluk zag ik ok een bibliotheekboek ling. Det wördt dus niet mear terugge bracht, scheut d’r döar mie hen. En ik zag de niet teeng te hoalen stoomwals van regels en formulieren al op gang komm. Det de bibliotheek van Schalkhaar oaver een joar nog mar wear ‘ns een brief schrif, een dwangbevel töt inleaveren van det boek, geadresseerd an een verongelukt stel det an hoofdstuk 4 was en toen in de raampies van het vliegtuug zag det ze det boek nooit mear uut zollen leazen.

Ie kunt met ien hakschuuntie völle better honderd doden loaten ziene dan met honderd doden, hef een tillevisiemaker uut Hilversum mie vertelt. Een voetbalblad met Wesley Sneijder op de cover hef het zelfde effect, weet ik noe. Net as twee gruun beklede vliegtuugstoelen in een weiland in Tripoli.

Terwijl in Rotterdam de doden van de bombardementen van de twidde wereldoarlog herdacht werden, interviewde een ratte van de Telegraaf de enig overlevende Ruben. Noe heb ik het d’r toch nog oaver… Het jochie wus nog nie iens det zien olders dood waren. De Telegraaf was dus niet allenig fout in de oarlog. De kraante is nog steeds fout. Het is nie vöar niks det meansen die die kraante least mear negatief in het leam stoat en banger oaver stroate goat.

Het is echt woar, het leam wördt op alle fronten leuker as ie die kraante niet mear least.

Denne van Knöldert

Lees ook

Fietstocht door Duursche Waarden

DEN NUL – Staatsbosbeheer presenteert op zondag 8 augustus een fietstocht door de Duursche Waarden. …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.