Home / archiefcentraal / denne van knoldert paspoart

denne van knoldert paspoart

Dochterlief mos een paspoart hemm. Zie is nog minderjoarig, dus had zie mie en het paspoart van mien vrouw met enömm noar het gemeentehuus. Goed vöarbereid dus. Mar wat ik de hele tied det wie in die völ te grote hal van het gemeentehuus zaten te wachten töt wie eindelijk an de böarte waren an mien theewater al wel vulen: die vöarbereiding… het was niet goed genog.

D’r is altied wel een formulier, regel, ofsproak, gebruuk of andere onzin die roet in het etten gooit. Noe ok wear. Öm mien dochter een eigen paspoart te geem, mos mien vrouw ok een handtekening zetten. En de baliemedewerkster trök een formulier uut een la met de opmerking: “kiek, hier kun ie oe handtekening zetten, en doar kan oe vrouw det doene.

“Mar is mien handtekening niet genog dan?” wol ik weten. Nou, of ik stund te vloeken in de kerke. Het meanse keek mie an as of ik niet wusse det d’r dagelijks honderden kinderen illegaal paspoarten halen bie de balie van het gemeentehuus die dan ollemoal illegaal met hun vader noar het butenland vertrökken.

Noe wul het geval det mien dochter de handtekening van mien vrouw goed kan noa doene. Die hebt wule haar eleard öm van det gezöar of te weane van al die briefies vöar schoele. As ze zich verslöp kan ze zelf een brief maken det ze noar de dokter mos. En lest leut ze mie het rapport ziene woar mien vrouw de handtekening al onder ezet had, mar mien vrouw was nog niet thuus.

(Op schoele vergeliekt ze zo’n ziekmeldbrief met aantekeningen uut het schrift as controle det een leerling die briefies niet zelf schrif. Dus hebbe wie altied een paar eigen geschreven brievies kloar ling op het keukenkassie. En wie is d’r dan echt ziek? Die controleur op schoele toch?)

“Heb ie eam een penne? Mien dochter kan die handtekening van mien vrouw wel eam zetten. Het verschil zut niemand”, stellen ik an de balie van het gemeentehuus vöar. Prachtig, öm de gewetensnood an zo’n gezichte dan of te leazen. “Mmmar mennear” bracht ze uut.

Wie hebt d’r verder mar gin probleem van emaakt. Buten bie de auto hef dochterlief de handtekening vervalst. Wie mossen wel wear een kwartier in die völ te grote hal op oonze böarte wachten. En doarnoa mos ok de pasfoto nog drie kear een kwart millimeter kantelen vöar e goed op eplakt was. Nog eam vier vingerofdrukken en toen was het goed.

Asse wie doar België mar wel met inkomt.

Denne van Knöldert

Lees ook

Inschrijving VechtdalTrail in Ommen geopend

OMMEN – Het was lang spannend, maar met de aangekondigde versoepelingen vanaf 30 juni lijkt …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.