Home / archiefcentraal / denne van knoldert leksie

denne van knoldert leksie

Die wat muuite haan met leazen, mochen van de wekke met het examen wat langer oaver de opdrachten doene. Mar dan mos ie wel een verklaring van dyslexie bie oe hemm. Mien zunne mog nie langer bliem want die hef niks. Wie hebt ‘m oaveral wel op onderzöcht mar d’r mankearen ‘m niks. Blie? Op verjoardage gif det soms toch het gevuul det ie d’r nie bie höart met zo’n kind. En wie waren d’r nog wel zo zeker van det het leasproblemen zollen wönn. Wie hebt ‘m döarümme Leksie enuumt.

“Bedoelde u dyslexie?” vreug Google mie toen ik via disleksie d’r achter probearen te komm hoe ie det woard precies schrieft…

De dyslexie-klanten langer de kans geem ömdet ze minder goed kunt leazen en schriem, het is wat mie betreft het eind van het learsysteem. En gelukkig mar, want watte wie noe hebt deugt niet. Det giet uut van kennis, van weten. As ik zo een bittie ömme mie hen kieke, bent de luu met kennis niet echt de luu woar ie de oarlog met wint. Meansen met kennis uut buukies kunt det vake mar muulijk toepassen. Terwijl meansen die bepaalde dinge heel goed kunt toepassen gin buukies neudig hebt.

Gottegod, mut ik det ollemoal schriem in de examenwekke?

Hoe zette wie het systeem op de kop? Döar oaveral een ofwieking van de maken. Dyslexie, dyscalculie, die kenne wie al wel. Dysconcentratie is ADHD, bie mie op het werk hebt ze klaslokalen met glaswanden woardöar ie goed kunt ziene wat d’r döar de gangen löpp. Bent die ADHD’ers gek op. Zelf had ik last van dysfrans. Ik heb det twee joar evolgd in de earste klasse mar verder dan garcon vöar gazon ben ik niet ekomm. Zie hebt mie toen gauw noar een dyslocatie döar estuurd.

Ik heb ok last van dysschei- en natuurkunde, van dysofkortingen en van dys-hun, hen of ule. Toen ik in het leger zatte bleek ik zelfs dys-autoritair gezag te hemm. Kapitein Kleingeld gaf mie een S5 en zei det ik extreme muuite hadde met autoritair gezag. Mar ik höaren det e zei det ik last had van extreem autoritair gezag. Foei, wat wönn die man kwoad op mie. Ik zegge: “Kiek noe mar, doar kan ik nie teeng.”

Ik denke det iederie wel eans dissonant (wrum heet det dan wear niet niet dyssonant?) in is. As iederiene dan langere examentied zol krieng, dan is d’r feitelijk gin probleem mear.

Denne van Knöldert

Lees ook

Coöperatie Welsum Duurzaam op zoek naar deelnemers

WELSUM – Coöperatie Welsum Duurzaam houdt op donderdag 4 november een voorlichtingsavond in dorpshuis de …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.