denne van knoldert goa stoan

Ik benne een kear in de Grolschveste west. Twente – Volendam, 1-0. De goal veul in de derde minute en iederiene dach det het d’r wel tiene zollen goan wönn. Ik doe dit op mien geheugen, met det ik dit schrieve bedenk ik mie det het al anderhalf joar terugge was. Volendam zat dit joar niet in de eredivisie. Saaie pot, prachtige sfeer. Vöaral toen wule op last van zingend publiek mossen goan stoan as ie vöar Twente waren.

In het westen vroagt ze zich of hoe det noe kan, det Twente zo goed was dit en vöarig joar, hoe het kan det doar spöllers better wördt. En in Eindhoven wisselt Rutte een spöller die een blunder maakt. Nou, det is de uutleg. Det is het verschil tussen ontwikkelen en prestearen. Ie kunt oe allenig mar ontwikkelen as ie fouten mag maken, prestearen mút zonder fouten. Cruijff zeg: “wule streeft noa de besten te weane, wie streeft niet noa kampioen te wönn.” Det is feitelijk hetzelfde. Cruijff kan d’r ok niks an doene det de besten vake kampioen wördt. Mar hij bereikt metiene det het publiek niet met witte zakdoekies giet zwaaien as d’r af en toe gin kampioenschap ehaald wördt.

Sander Bosscher was ofgelopen weekend wel zo ongeveer de belichaming vöar die rustige sfeer bie FC Twente woar niemand onder druk van de baas stiet. Zie vreung ‘m hoe e zich noe vulen. Hij antwoarden met een teengvroage: “Wat denk ie zelf. Det hoef ik toch niet uut te leng?” En ok: “Och, noa de winterstop dachen wie ‘noe mut het mar geböaren’. Disse wekke was det ok de hele wekke zo. ‘Zundag mut het mar geböaren’. En vanmonn ok, ‘noa, vandage mut het mar geböaren’. Tja en noe, noe noa de wedstrijd, noe is het geböard.”

Van Gaal dut det net aansömme. Bie hem mut ie prestearen. Gin tied van ontwikkelen. Hij is döarumme altijd kortstondig succesvol en lött de club dan ontredderd achter. Resultaat halen, det is het medogenloze doel. Hij wul doarin alles noar zien hand zetten. Zelfs de Duutse taal. Hij is met Bayeren praktisch kampioen. D’r is allenig nog een theoretische kans det Schalke ze inhaalt. “Wir sind theoretisch kampioen”, zei Louis op de tillevisie. “Praktisch”, zei de journalist. “Sie sind praktisch kampioen. Niet theoretisch.” Van Gaal antwoarden: “In Nederland in det aans. Mar det zal dan wel Duuts weane.”

Bosscher had ezegd: “Ok goed, doe mar een biertie.”

Denne van Knöldert

LAAT EEN REACTIE ACHTER

Vul alstublieft uw commentaar in!
Vul hier uw naam in

Deze site gebruikt Akismet om spam te verminderen. Bekijk hoe je reactie-gegevens worden verwerkt.