Op de weg noar Deamter heb ie vanof Roalte een paar mooie inhaalmomenten. Vanof de caravans töt de ofslag Broekland bevobbeld is de weg mooi recht dus het oaverzicht goed. Mar sinds de rotondes bie Wesepe is het hillemoal een feest. Wat kun ie doar mooi inhalen.
Toen de rotondes d’r nog mar net laang, wachen ik altied eam op wat de auto vöar mie mie deud en nam ik het aandere wegvlak. Meestentieds nam mien vöarganger de butenbochte. Ik zetten mien auto dan op de binnenbane woardöar ik noa de rotonde het vöardeel van de korte invoegstrook hadde. Op det wegvlak plaatsen ik dan de echte inhaalmanoeuvre.
Later kreeg ik doar op een aandere maniere schik van. As een opdringerig type met de bumper op mien trekhoake zat, wus ik natuurlijk al lange det de rotonde bie Wesepe zien inhaalslag zol wönn. De man gassen in de binnenbochte zien waang noast die van mie en wol op die korte invoegstrook het inhalen ofronden. Mar doar dwarsboomde ik de actie, döar doodleuk ok een pleare gas te geem. Die kjel blif dan kort vöar het eind van de invoegstrook niks aans oaver dan in de remme te klimmen en töt de volgende verkearslichten achter mie te bliem.
Kons heb ik een neeje maniere ontdekt öm de rotondes bie Wesepe te nemmen. Vanuut de butenbochte an komm riene, korte vöar det de rotonde begint oavergoane op de binnenbochte en dan bie het uutgoane wear noar de butenbochte. Vöardeel: ie kunt met volle snelheid rondom het obstakel komm.
Nog mooier is het die beweging van hierboam te maken van butenbochte, noar binnenbochte, noar de verharding van de binnenberm, dan wear binnenbochte, butenbochte. ’t Is eam opletten det d’r niet iene links van oe ridt, mar is det niet het geval, dan kan ik mie bienoa gin mooiere inhaalpoging vöarstellen. Ie riedt achter een auto an in de butenbochte. Met det oe vöarganger netties met de weg meedreit schiet ie rechtdöar oaver binnenbochtge en middenberm. Zonder vaart te verminderen (want de weg is wel rond, mar ie riedt kaarsrechtdöar) knap ie de auto vöarbie en nog vöar de invoegstrook an de aandere kaante begint heb ie de koppositie oaver enömm.
Mooi man.
Det zo’n maniere van inhalen aanderen an het schrikken kan breng, doar had ik nooit bie stille stoane. Töt ik lest op die maniere inehaald wönn döar een Elbobusse.
Denne van Knöldert