Bie RTV Oost haa’n ze d’r vermoedelijk een stagiaire vöar an het werk ezet, toen d’r zundag melding binnen kwam van een zunnige brand. Wat ik d’r mie nog van herinner is det een mevrouw pannetjes op het vuur had stoane, toen op het balkon eam in de zunne ging zitten, vervolgens in sloap veul, det de pannegies toen dreuge kokken, det d’r doarnoa braand uutbrak, det de vrouw zich vervolgens rot schruk en det e toen noar buten is erend. Vervolgens reuken de buren braand en belt de braandwear, die tikt een roete in want de bewoonster had de döare achter zich in het slot egooid terwijl de slöttel nog binnen lag en de brandwear mos op de ien of aandere maniere toch noar binnen…
Ik zeg al, doar is een stagiare met an het schriem ewest. Al was het allenig mar vanwege de ‘pannetjes op het vuur’. Een journalist schrif ‘pannen op het vuur’. Zo beschouwd is het vermoedelijk ok nog een vrouwelijke stagiaire ewest, of een homosexuele stagiaire, det kan ok. “Oeps, had ze de pannetjes op het vuur laten staan? Nee toch?”. Ik höar het wel as dit te generaliserend is.
Woar ik akelig beneejd noar benne, is hoevölle bier die bewoonster – woar ze woont ben ik al lange wear vergetten – op had toen ze buten in sloap veul. Want ik weet niet hoe het ule vergiet, mar as ik pannegies op het vuur zette, dan goa ik niet vervolgens eam zó lekker in de zunne zitten det ik d’r bie in sloap valle. En as mie det dan toch oaverkomm was, dat was ik nie in paniek noar buten erend, mar dan had ik de brandwear ebeld. Noe hebt de buren de brand bemerkt, niet de vrouw zelf. Die stund buten op stroate op de biene te trillen.
Niet íen pannegie op het vuur, mar ‘pannegies op het vuur’, dus mevrouw was ok nog uutgebreid an het kokken. Had die stagiare van RTV Oost toch op zien minst an de politie munn vroang wát die vrouw an het kokken was. Want det is hedendaagse journalistiek. Wule wult de feiten. En wel álle feiten. Ik wul weten hoe de buren de brand reuken. Of ze goede buren an de – ik weet wel zeker – dronken mevrouw haa’n. Op welke verdieping ze woo’n. Hoevölle kratten d’r op het balkon stunn. En ik zol d’r ok goan zuken noar een hennepplantage.
As de brand döar ezet had, was d’r een neeje aswolk boam Salland woar enömm.