Ik hebbe vöarige wekke de bezunigingsplannen van ’s lands ambtenaren vöarbie zien trekken. Ik mut zeng, doar kom ik qua grapdichtheid as columnist mulijk oaverhen. Beköaringen en treinkaarties noar inkommen, subsidie op hypotheken wel én niet ofschaffen, korter noar schoele, mear regels öm minder regels te creëren… En op 1 april wönn d’r niks terugge dreijt, het waren gin grappen.
Kiek, het kabinet had het slim an epakt, toen de crisis d’r was wollen ze niet direct bezunigen, mar earst eam goed bekieken wat d’r an de had was en hoe het verder zol goane. As ofleiding hebt ze toen de ambtenaren an het werk ezet öm te kieken hoe of wat d’r het beste bezunigd kon wönn. Ambtenaren an het werk zetten, doar is niks mis mee, mar ze onzinnig an het werk zetten, det is sneu. Zie haa’n het zelf ok wel kunn ziene det de opdracht raar was, die ambtenaren, mar ja, haa’n ze een kear wat te doen, dan pak ie zo’n uutdaging natuurlijk ok op. En doarbie: de meest logische bezuniging is een bult ambtenaren d’r uut want die hoalt mekare an het werk. Hoe vöarkom ie det? Döar zelf plannen oaver bezunigen te ontwikkelen…
De ideeënmachine leidden töt niks aans as een grabbeltonne vol bezunigingen die niks aans klinkt dan wat links, rechts en geleuvig altied al roept. Niks gin neejs onder de zunne. Mar de crisis is al wel een eind vot en het lik wear goed te goane, dus in plaatsen van 35 miljard, wönn het 30, 26, 23 en noe geleuf ik 18 miljard bezunigen.
Mar hoe? Ik heb de twee grootste klappers neans eleazen. Vertrouwen hemm in de burger en dus alle regels ofschaffen. En drugs legalisearen. Vöarbeeld: De wichter haan lest een feest van schoele. Zowel leerlingen as learkrachten leupen doar met een flinke stuiter op in het rondte. “Och valt wel mee”, höaren ik, mar zie zollen d’r een auto niet mear met meung besturen. D’r leup ok een jonge met een joint in de haand. Die is d’r uut ezet. Pappa is ebeld en die mos zoonlief ophalen (zie waa’n vöar het feest noar Balkbrug erene…). Het joch is ok nog twee daang eschorst. Asof wie in de middeleeuwen leaft.
As ie de drugs legaliseart kan driekwart van de politie noar huus en kan de inbraakverzekering met de helfte ömlage. Want in plaatsen van mear last, zult wule mínder last hemm van drugsverslaafden. Mar ja, wie vertrouwt mekare doar niet in.
Denne van Knöldert