Home / archiefcentraal / denne van knoldert bakfietse

denne van knoldert bakfietse

Öm oons te onderscheiden zuke wie altied noar biezunder gedrag en uterlijk. Mar ömdet wie niet zo goed kunt zuken, vindt wule altied ollemoal hetzelfde. En döarumme fietst iederiene noe op zo’n bakfietse met een holten kiste of rieten maand d’r vöarop.

Het kump altied wat onverwachts eans vandan, mar as het kump, dan kump het goed. Spiekerbroeken met van te vöaren gemaakte gaten, geklöard punkkapsel, een scheve ponnie vöar an de kop, brillen die veartig joar terugge ok in de mode waren en dan noe iniens ok de bakfietse met holten kiste vöarop.

Earst wol iederiene een fietse met völle versnellingen. Lekker licht en soepel. Doar zag ie dan ok meansen op fietsen woarbie ik mie van alles konne vöarstellen, behalve licht en soepel. En toen wönn het de opoefietsen. Iniens zag ik doar ok jochies op rondfietsen die bie mien weten op een crossfietsie thuushöaren en woarvan ik later höaren det ze toch heus het leger inwollen. Ik denke det ze det van die oepoefietse dan better mar nie kunt vertellen. En noe is iederiene dus ‘into’ de bakfietse met rieten maand vöarop.

Woar kump zoiets vandan? Bie hoge hakken en diepe decolletés kan ik mie d’r nog wat bie vöarstellen. Det is bedacht döar mannen opgewonden raakt van macht. Dan bedenk ie kleare woarmee ie de vrouw feitelijk voortdurend mishandelt. En vrouwen, tja, die loat zich det nog welgevallen ok. Mar bie ‘iederiene an de bakfietse krieng’, doar kan ik gin beeld bie krieng.

D’r mut eans een Chinees – want doar komt die fietsen vandan – op mear dan allenig het fietsidee ekomm weane. Hij mut d’r metiene iets bie bedacht hemm hoe hij iederiene het gevul mos geem det zo’n fietse iets unieks was, det as ie die kochen det ie dan de ienigen waren met zo’n fietse en det ie dan wel heel erg biezunder waren.

Die Chinees is doar oarig goed in eslaagd. Ik hadde vöarig joar een winterjasse van de Wehkamp ekoch. Net as half Salland…. Det was minder. Mar gek genog geldt det vöar de bakfietse niet. Nie van “goh jammer det ie ok zo’n fietse hebt”, mar “oh leuk, heb ie d’r ok iene?”

En zo zag ik van de wekke een vrouw van midden 30 noar höar werk ploeteren. Geblondeard hoar, hoge hakken en strak rökkie vöar de baas, mar met de konte op een bakfietse met een rieten maand d’r vöarop.

’t Is nog nie zo makkelijk oe te onderscheiden en oaveral bie te wullen höaren.

Denne van Knöldert

(Knoldert op twitter)

Lees ook

Terras Veldhoek blijft dicht na deal met burgemeester

HEINO – Horecaondernemer Wilco van Dam ziet af van de opening van het terras van …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.