Bisschop De Korte wul herinvoeren det katholieken op vriedag vis et in plaatsen van vleis. Op moandag en dinsdag een lekker biefstukkie, woensdags vegetarisch, donderdags een misdienaartie, vriedag vis, zoaterdag en zundag een gezonde hostie… ie hebt de wekke ok zo mar wear rond.
Vöaral hosties bent gezond en ie kriegt d’r gin proat van. Hosties bent namelijk – denk ik – van graan en ie mut acht kear de hoeveelheid graan in een koe stoppen, wul ie de zelfde voedingswaarde an die koe terugge verdienen. Dus better een maïskoek etten, dan vleis. Better een hostie dan een misdienaar.
Mar det ie van hosties gin proat kriegt, doar mut ik van terugge komm. Met carnaval wönn d’r een homo-prins carnaval (het feest was hillemoal te toppie) de hostie eweigerd. Daags doarnoa gingen d’r ollemoal homo’s noar de kerke en toen hebt ze de hostie niet uutedeeld. De homo’s konn zich nog wel wat vöarstellen bie het lichaam van Christus mar de rest van de beminde geleuvigen zat d’r mar mooi met.
Opperpriester (en ik denk ok homo) Antoine Bodare leng uut bie De Wereld Dreijt Döar det de hostie niet bedoeld is vöar protest, mar hij vergat det het begun bie die prins carnaval. Een leugentje öm bestwil. Det mag, want een katholiek kan biechten.
Zit ik toch nog met die vis op vriedag. De Korte wol det invoeren öm iets te doene teeng het broeikaseffect en teeng de honger. Asse wie onze graan niet mear in een koe stopt, mar in oons zelf, hef de wereld in ien kear acht kear zo völle etten. En ie haalt d’r een hele schakel van koeien fokken tussenuut. Det lik mie economisch ok een heel goed model. De BV Wereld kan dunkt mie niet rigoureuzer snoeien in de onkosten. ’t Is een bittie as iedere dag de kraante rondbrengen terwijl ie het neejs al lange weet. Det kan goedkoper.
Doarmee heb ik het antwoord op ‘wrum vis op vriedag’ nog niet van alle kaanten belicht. Want wrum is vis gin vlees? Nou, det kump uut de tied det de Italiaanse vissers armoe lee’n. De paus hef toen iedere katholiek verplicht op vriedag vis te etten. Sindsdien is vis gin vlees mear, zelfs niet vöar de meeste vegetariërs. Zo is het met onkruud ok ooit egoane. Een monnik hef kruud verdeeld in kruud en onkruud. Sindsdien is brandnettel onkruud. Wrum spruuties nie?
Denne van Knöldert.
(knoldert op twitter)