Ik weet nie hoe det met ule giet, mar ik heb d’r nogal een sleur an öm oaveral en altied koffie te drinken. ’s Mons bie het ontbijt, bie gebrek an pauzes de hele dag döar gewoon achter de pc, ’s oams öm 20.00 uur, mar ok as ik bie meansen over de vloere komme, met een collega eam tussendöar wat beproate of bie de vereniging een vergadering hebbe…
Altied oaveral een köppie koffie d’r bie, zelfs as ik een auto kope, bie de notaris zitte of een hypotheek bie de banke ofslute. Eigenlijk is het net as toen ik nog roken, d’r bent zóvölle vaste gelegenheden öm d’r eam een köppie koffie te drinken, mar of het ollemoal altied eam lekker is.
Nem noe de senseo. ’t Is bocht. Nepkoffie die zo nep is det ik het met een blinddoek ömme in een pruverieje niet iens onder de familie der koffies zolle scharen. Mar wie drinkt het massaal. ‘Makkelijk” is het argument.
Of de koffieautomaat op oons werk. ’t Kon verdullemies wel oarlog weane, ISS is de leverancier van de machine, dezelfde club die ok de planten op kantoar onderhölt en woar as of ie ok ene grösdak kunt bestellen. Ja inderdaad, het is an de koffie te pruum det ze doar niet hun corebusiness van emaakt hebt. Ik heb ontdekt det ie het köppie halverwege het maakproces uut de machine mut halen. Dan pruuft het nog net wat aans as opgewarmd water met een biesmaak.
Ik Moskou heb ik thee learen drinken. Ik lusse gin wodka, dus toen bleef d’r feitelijk mar íen drankie oaver. Thee. Een sterke pot stiet de hele dag te pruttelen op een waxinevlammegie. Vöar een lekker köppie thee verdunt die sterke hap met kokkend water. Het beveul mie zo goed det ik de gewoonte met noar Salland wolle nemm. Mar vöar ik het wusse was de oale gewoonte van altied oaveral een köppie koffie terugge in mien dagelijkse patroon.
Van de wekke bedach ik mie de oplossing. Ik loat het patroon zo as het is. Mar ik goa koffie gewoon thee numen. Ik denk en doe op de koffiemaniere, mar ik drinke dus al die kearen gewoon thee.
het leek mie een goed plan. Mar thuus kreeg ik de haane d’r niet vöar op mekare. Want, zoas mien dochter zei: “ik lusse gin koffie”.
Denne van Knöldert
(knoldert op twitter)