Home / archiefcentraal / denne van knoldert gouden baan

denne van knoldert gouden baan

Ik zatte vöarige wekke dinsdag op de banke noar Sven Kramer te kieken en had het gevuul det ik ergens bie Lyon op de tienbaansweg zatte. Op het allerlaatste moment zeg mien vrouw: ‘ie mut hier links knuppel, doar stiet Marseille’. De wichter schrukken zo det ze vöar het earst in 1200 kilomter de kleppe eam dichte heulen. Mar ik weet inmiddels hoe goed d’r kaarte eleazen wördt met vakantie. Dus ik reed gewoon vandan en hadde zo mooi de rondweg van Lyon te pakken, de snelste weg noar die prachtige kust van Zuud Frankriek. Het was een gouden vakantie, kan ik oe verklappen.

In een split second de goeie beslissing nemmen, ok as ie onder topdruk functioneart, det is de kunst. De wichter haan op de achterbanke de hele weg al ling klooien. Bie Wesepe vreung ze al of d’r nog snoepgoed met ekomm was en vöar Apeldoarn mos d’r al iene noar de wc. En toch bie Lyon mien vrouw negearen döar niet de op het leste moment angegeven ofslag te nemmen. Dét is topsport.

Kempers deud twee dinge. Vertellen hoe hard Kramer reed. Én biehoalen wat het verschil met Lee was. Hij was nog net an het schriem toen Kramer de bochte uutkwam. En Sven kwam d’r aans uut as aans. Zo gauw het mog, sneed e in ien kear döar noar de butenbane. Det geböaren toen Kempers nog net ‘- 2.09’ opschreef. Kempers keek op, zag Kramer in de butenbane en reup in een reflex: “ie mut noar binnen toe”.

Mien vrouw kan det ok heel goed, twee dinge tegelieke. Wel dree. Met die vakantie ok. De wichter pedagogisch onderhoalen zodet ze rustig blieft (as ik twee dinge konne had ik én de auto stuurd én de wichter een klap öm de oaren egeem), mie onderweg van koffie vöarziene (want dan hoeve wie minder te pauzeren) en dus ok de weangkaarte d’r nog ‘ns bie leazen.

Kempers blif nog coach, mar hij zöch stiekem al wat aans. De personeelsadvertentie ezene? ‘Goede baan gezocht.’ Hij schient iets te zuken woar ze niet noar ‘m lustert.

Goede baan gezocht. Det deud ik in Zuud Frankriek ok toen wie ien kear voärbie Lyon waren. De goede bane op weg noar de gouden kust van Europa. Ik weet dus as gin aander hoe ie kunt genieten van goud.

Denne van Knöldert

(knoldert op twitter)

Lees ook

Lefulux Wonen opent met grootste aanbod meubelen en interieurobjecten van versteend hout

(Advertorial) Aantrekkelijke korting tijdens openingsdagen op 2, 3 en 4 oktober HEETEN – De unieke …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.