Home / archiefcentraal / denne van knoldert bedrijfshulp

denne van knoldert bedrijfshulp

Op het werk vroegen ze of ik interesse hadde in de BHV. Belangeloos Huusdieren Verzörgen, bedach ik snel, of Bier Happen öm Vier uur in de middag. Mar det kon het ollemoal niet weane. Bedrijfshulpverlening bleek het te weane. Ie kreeng d’r cursusmiddage vrie vöar, dus det leek mie wel wat.

Pas geleden was d’r oefening. Van mie wönn verwacht det ik een nepramp in goede banen konne leiden. Mar of ik det wel kanne… “Bie een echte ramp neans noar lusteren en maken det ie buten komt”, lear ik de wichter. Noe ik d’r beroepshalve an de aandere kaante teeng an kieke, wul ik mien beste bientie dan ok nog wel vöar zetten.

De oefening begun met een alarmbelle die al het personeel op scherp zetten. Iederiene schruk van het werk op, ien collega schruk wakker. Zie haa’n mie van de oefening op de heugte bracht, dus ik had ’s oams van te vöaren het dreijboek d’r nog eam bie ehaald. Twee dinge streden in zo’n beginnende ramp öm vöarrang. Weten wat d’r precies an de hand is en alle volk ‘in huus’ töt rust manen. Volgens het dreijboek was die rust nog wel het belangriekste. Mar ik weet det zo net nog niet. Want stel det ik de ramp konne verkleinen döar snel in te griepen. Eigenlijk leek mie det nog wel het mooiste. Alle personeel in rep en roer, Denne die dan via de intercom doodleuk kan ömmeroepen det een dreigende ramp of ewend is.

Met det het alarm ging, waren al die gedachten weg. Ik scheute vanzelf op de automatische piloot, greep de microfoon en zei: “het alarm giet of, wie onderzuukt wat d’r an de hand is. Blief rustig op oe werkplekke. Hoal de ramen en döaren dichte. Wacht nadere instructies of.” En toen ging op weg noar de ramp. Ik mosse in lokaal 315 weane. Dus ik vliege d’r noar toe, ben halverwege een gang en vreuge mie iniens of woar 315 eigenlijk is. Ömdet de oefening in mien oong toen toch al mislukt was, ben ik rustig terugge wandeld noar de receptie en hebbe mie oaver de lokalenindeling loaten informeren. “Zeg uh, d’r is een ramp in 315, mar woar vind ik det?”

Een leerling höaren die vroage en dach det het öm een echte ramp ging. Zonder zich te bedenken pakken zie het hamertie noast het brandalarm, sloeg het glaassie in en liet op die maniere het alarm in de brandwearkazerne of goan.

Ie stoat dan nog versteld hoe snel de brandwear vöar de döare stiet.

Noa evaluatie hebbe wie een dikke voldoende vöar de oefening ekreeng.

Denne van Knöldert

(knoldert op Twitter)

Lees ook

Speculaasactie van PCA Kwiek

RAALTE – De handbalsters van PCA Kwiek in Raalte gaan maandag 25 oktober vanaf half …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.