As een schoap op de rugge kump te ling, kan e niet van zich zelf wear op de biene komm. Het is een wijd verspreide wijsheid, Mar is het ok zo? Of is het een broodje aap? Ik persoonlijk, ik mut earlijk zeng: ik geleuve d’r gin snars van.
En ömdet ik d’r niks van geleuve heb ik het hier en doar in de groep egooid. Twee van de drie hebt d’r nog nooit van ehöard. Mar d’r is d’r ok altied wel iene die met völle wiesheid dörft te zeng det het zo is.
Lest kaarten ik het nog an in een gezelschap. “Ik heb lest nog een schoap op de rugge zien ling. Die lag d’r al heel lange”, reagearden d’r iene. “Doe mien zo’n vrouw”, zei een aander. Die kreeg een klap vöar de bek van wear iemand aanders, van een vrouw. Mar nummer een bleef volharden: “As ik ‘m niet ömmedreijd hadde was e dood egoane.” Hoe det of elopen was, wol het gezelschap weten. “Ja, uuteindelijk is het beest toch estörm.“
En doar lig mien probleem ok een bittie. D’r is d’r altied wel iene die een vöarbeeld hef, mar steekhoudend is het ollemoal niet. Net as een goldvis die al drie daang op de rugge kan zwemmen volgens zien baassie, mar doarnoa toch dood ging. Eans klopt dan het verhaal niet. Zo ok met het schoap. Ik zol zeng det het beest al op dood goan lag en vöar het gemak op de rugge was goan ling.
As het zo gevoarlijk is een schoap op de rugge te loaten terechte komm, wrum loopt d’r dan zo völle schoapen op de diek? Grote kans dan toch, det d’r iene ömmerolt?
Deskundigen die d’r vöar döar eleard hebt zegt det een schoap vier magen hef en ien van zien magen gebruukt vöar vertearen. Doar kump een boel gas bie vrie en det mut e d’r zo af en toe uutboeren. Hoe det klinkt, det wete wie ollemoal wel. Mar wat d’r in det beest geböart, doar hebbe wie gin weet van. Zie hebt mie ezegd det ien van die vier magen van een herkauwend schoap kan ömmedreien as ie ‘m wear recht oavereind zet. D’r kump dan een knöp in de ofvoer en zo blos het beest zich vanzelf op.
Ik geleuve niet det de evolutie zukke fouten maakt. Mar loat ze d’r bie Al Qaida mar gin lucht van krieng.
Denne van Knöldert