Ik zitte op Twitter. En ik hebbe d’r schik van. Twitter, ik zal het eam uutleng, want ik höare iederiene altied zeng det ze het niet kent en nie snapt. Mar ik weet inmiddels det het mear is van wat een boer niet kent det et e niet.
Twitter is namelijk heel simpel. Ie goat noar staging2.twitter.com en klikt op de button det ie graag met wult doene. Ie kriegt dan een emailadres en een wachtwoard en kloar is Kees. Oke, het is eam een stappie ingewikkelder ömdet het een @gmail.com-mailadres mut weane. In mien geval knoldert@gmail.com. En dan kun ie an de slag.
Alle berichten van iederiene die twittert komt bie mekare. As ie interesse in iene hebt kun ie angeem det ie die wult volgen. En as ze interesse in oe hebt, kunt ze oe volgen. Zo heb ik met de kabinetscrisis Maxiem Verhagen en Femke Halsema evolgd. Noe bent die d’r wear of, want die lui zöart op Twitter net zo hard as in de Twidde Kamer. Ik ben vast volger van Wim de Bie. De wederhelft van Kees van Kooten is op Twitter net zo goed as toen met ‘Keek op de week’. De Bie is nationale mental coach en geef de hele dag döar iederiene zinnige energie met. Jan Smeekens en Erben Wennemars volg ik ok, ik heb het Vancouverse appartement van mien buurman al mooi ezene.
Eam kort de woarden uutleng: twitteren is det wat vogels doet as ze met völle tegelieke in de boom zit. Ien zo’n twitter heet een tweet. Dus met zien allen berichies hen en wear sturen heet twitteren. As ik d’r iene make, heet het een tweet.
Volgens goed internetgebruuk bent d’r heel völle op Twitter die onzin verkoopt. “Ik goa koffie halen”. Of Halsema: “Nee, die halsketting die ik ömme hebbe is gin voodoo.” Lange verhalen mag niet, want een tweet mag mar 145 karakters hemm, det is met leastekens en spaties d’r bie. Wat ik d’r as uutdaging an zieje is det ik noe probeare columns te schriem van 145 letters. Det lukt nog niet hillemoal, mar zelf heb ik d’r al wel lol in.
Van de wekke nog etwitterd: het land wördt noe gereageard döar CDA en Christenunie. As de koningin het verplicht invoeren van hoofdduukies mar teenghöalt.
Ien probleem heb ik nog. Twitteren is volgen en gevolg wönn. Knoldert (woaronder ie mie kunt vinn) hef nog geen volgers. Zol det noa disse column aans wönn?
(Denne van) Knoldert