Home / archiefcentraal / column denne van knoldert verhuzen

column denne van knoldert verhuzen

Wie hebt op het werk een neej kantoar betrökken. De opleavering van het grote complex is al een joar lang twee kear uut esteld. Dus dan zol ie denken det het noe wel of zol weane. Mar nee, noe wie d’r ien kear zit, heb ik nog de indruk det ze de bouwvakkers die noe niks kunt doene vanwege de vorst, gerust op det kantoar d’r bie kunt gebruken.

Het is gin kattenpis, zo’n neej kantoar te goan bewonen. Ik werke völle met de computer dus vöar det ie wear op een netwerk zit, teeng de tied det de computer weet noar wulke printer de opdrachten mut, wannear íe ien kear weet woar de prints d’r uut komt rollen en – het meest belangriek – wannear ie ien kear weet woar de koffie te halen is, teeng die tied is de earste werkwekke wel ömme. Al hillemoal ömdet ik een bane zonder concurrentie hebbe (onderwies), dus det de baas beslöten had dette wie de earste dag van het neeje joar gewoon hillemoal mochen besteden an inpakken van de neeje bureaus. De studenten hebbe wie gewoon noar huus e stuurd.

Noe had ik die iene verhuusdeuze al snel op de planken van de neeje kaste terechte kreeng. Het ienige probleem was nog wel wúkke kaste, want wegens ‘minder papier’-beleid kreeng wie ollemoal de helfte minder kastruumte dan vöarheen. Ik had ezegd de ruumte van twee verhuusdeuzen neudig te hemm, kreeg de helfte en had dus ruumte genog vöar mien iene deuze. Mar niet alle collega’s waren doar op vöarbereid.

En d’r was ok nog een prullenbakken-probleem. De architect had, zo zei e, twee componenten-bakken bie ieder bureau near ezet. Een te klein compartiment vöar oald papier en een nog te kleiner deel vöar ander ofval. Het andere ofval giet noe in het papierdeel en het papier doe ik in de verhuusdeuze. Heb ik en de architect allebei oonze zinne.

Ik ware die earste dag dus goaw kloar. Op het instellen van de tillefoon noa. D’r was een handleiding bie. Druk op de wereldbol, selectear optie 4, selectear ‘kies’, type oe interne tillefoonnummer in, druk op ‘pin’, toets de pincode (zes cijfers) in, druk links onder op verzend, wacht töt de anmelding elukt is. Det was het anmelden. D’r was ok nog een maniere van ofmelden. En vöar de volledige handleiding – d’r was dus nog mear – kon ik op internet terechte.

Noa, ik heb mie an emeld, goa mie nooit mear ofmelden en geef an meansen allenig mien mobiele nummer nog döar.

Denne van Knöldert

Lees ook

De Lemeler begraafplaats is weer up-to-date

LEMELE – De in september vorig jaar gestarte renovatie van de bijzondere begraafplaats in Lemele …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.