Home / archiefcentraal / column denne van knoldert teengvallen

column denne van knoldert teengvallen

“Ja ok gefeliciteard” zei iemand van det jonge volk det de wichter in huus uuteneudigd haa’n van 31 december op 1 januari. Niemand was joarig, mar de persoon in kwestie in de lorum. Wie waren toen 25 seconden het neeje joar in en hún feest mos nog beginnen, het feest in Ramele, Roalte. Met oaverheidsgeld in de biene hoalen, is doar een feest near ezet det pas öm half iene begun en noar ik mie heb loaten vertellen töt half zesse in de ochtend duren. Ik wusse niet det het CDA van det soart activiteiten heuld. Sodom en gomorra zol ik denken, mar de christenen betaalt d’r teengswoardig zelfs an met.

Van mie mag het trouwens. Het lik mie noe veiliger in Ramele dan in de tied det ik doar as jochie van 16 de earste uren van het neeje joar rond scharrelen. Buurman Gam sturen oons det joar noar huus toe, want hij mos melken, terwijl Gam toch agis gin vrogmelker was. En toen mien kammeroad thuus kwaamp, gebeud zien va ‘m det e gelieke wel döar kon noar de ochtendmisse van half achte. Kun ie noagoane hoe as het CDA is e schöam in haar opvattingen. Zie komt steeds korter bie hoe ik d’r oaver denke.

Mar ik heb van de wekke een mear heikele kwestie. Of een kammeroad nog mooie verwachtingen vöar het neeje joar had, wol ik weten toen het oale joar nog net een minuut of viefe in leam was. “Nee”, was zien stellige antwoard, “ik verwache d’r niks van, dan kan het ok niet teeng vallen.” De tied det ik zelf van oald op neej niet mear recht op de biene konne stoane lig verre achter oons, ik was disse nacht zelfs zo helder, det ik diepe noadache oaver disse filosofische wiesheid die ie wel vaker höart. En ik kwam töt de conclusie det het niet klopt. Het is niet zo det as ie gin verwachtingen hebt, det het dan teeng kan vallen. As Ajax teeng Feijenoord spölt en ik heb d’r van te vöaren gin verwachtingen van, dan valt het mie toch teeng as Ajax met 17-1 verlös. En as ik gin verwachtingen heb van hoe hoge de belastingbrief dit joar zal weane, niet iens een verwachting hebbe of het in mien vöar- of noadeel uutpakt, dan valt het mie hoe dan ok teeng as ik dertig duzend mutte betalen.

Het leaveren een discussie op töt wie onderbrökken wönn döar det jonge volk. “Hartelijk gefeliciteard.” Ik zeg: “En wat verwach ie van het neeje joar?” Zie zeg: “Niks, dan kan het ok niet teengvallen.”

Denne van Knöldert

Lees ook

Stekjesbeurs in centrum Lettele

LETTELE – Zij-actief houdt op zaterdag 2 oktober weer de jaarlijkse stekjesbeurs in het centrum …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.