column denne van knoldert nog steeds glad

Ik schreve eind vöarig joar oaver gladdigheid. Het heult vanof toen an met glad te weane, Pas van de wekke wördt het better. Mar die smeltsnee is ok verroadelijk glad. Wat te denken van de man die in Heino op zien konte terechte kwaamp in de dooi-blubber. De fietse scheut nog een eindie döar en doar zat e. Pal vöar de ingang van de supermarkt woar het met in- en uutkommend winkelpubliek machtig druk was.

Wat doe ie dan as oe zo iets oaverkump? Hoppen det niemand het e zene hef! Dus deud de man net of het heel normaal was det e doar op stroate zat. Hij zetten zien pette wear recht, kreup – echt woar – noar zien fietse en saams kwamen ze wear in de biene. Stoer nam e een kort anleupie, zetten een bien op de trapper, zwaaien het aander oaver het zaden en toen… lag e wear plat op de snufferd. Toen hef iene ‘m in de biene ehölpen.

En die vrouw die met rielessen van de weg of raken. Heel langzaam scheuf de auto de berm döar, zo de sloot in. Stoa ie doar te kieken. Nog nie iens een riebewies en dan al in de sloot. Ik kenne vrouwen – vöaral vrouwen – die mét riebewies nog nie iens achter het stuur dörft te kroepen. Hoe zol het disse leerling dan wel niet goan? Zol die ooit het riebewies halen?

Het dearntie det kons mien zunne met de auto thuus kwam brengen, die was pas eslaagd. Mar slimmegheid zat nie bie het lespakket. Bie het kearen dreien ze de auto zo achterhears een enorme bult sneeuw in. En doar was ze nooit wear weg ekomm as ik nie midden in de nacht vanuut het warme bedde in de koale kleare was e schötten en de handel met mien auto wear vlot e trökken had.

Det was nog een hele tour. Toen ik uutleng det ze de auto in de twidden mos zetten en de koppeling langzaam op mos loaten komm as ze vulen det de slepkabel strak stund, begun ze zowat te lippen. Toen ik toevoegen det ze niet te hard vöaruut mos schieten as ze lössraken ömdet ik aans een foeke in de kofferbak zolle krieng, leek de paniek hillemoal toe te sloane. Ik heb toen gin bedenktied mear oaver eloaten. Dertig seconden later was de auto vlot etrökken en stund haar auto dwars achter die van mie. Hoe det kan? Gin idee, vermoedelijk een goeie chauffeur.

Denne van Knöldert