Of ik d’r niet mear met hen wolle slabaksen, vreung ze mie lest, toen ik de contributie oaver 2009 nog nie betaald hadde. Mooie uutdrukking, ‘niet met hen slabaksen’. Dut mie wat denken an sjoksen. Of an oe poestiger vulen. “Foei wat vuul ik mie poesterig”, zei de man die d’r an kwaamp sjoksen. Ie konn an alles ziene det det d’r iene was die oaveral mar wat met hen slabakst. Nie zo iene van manks te late, mar van aait vedan nie op tied.
Kiek, dan hebbe wie het oaver het echte plat proaten. Zukke platproaters bint d’r nie zo völle mear. Mar meansen die d’r wat met hen slabakst, doar bent d’r legio van. Nem mie zelf. Ik slabakse mar wat hen met de contributie, as het öm mien basisconditie as wielrenner giet ben ik nogal wat slabakserig van aard. En loate wie het al hillemoal niet hemm oaver het schilderen van het huus, de kaanties van het gazon biehoalen en de bunnegies bewaren vöar de belastingdienst. Man, man, man, wat kun ie d’r in het leam eigenlijk nog wat of slabaksen.
Sjoksen, ok mooi. Ie kunt paradearen, wandelen, een hoastige tred hemm, vöarbie stoe’m, goande weane, zelfs sloffen… Mar sjoksen is det ollemoal niet. Sjoksen is iets det ie doet met schoene woarvan iene de veters löss hef, een Manchester broek an, bretels ömme, en dan wat schöffies-achtig onderweg een löag blikkie cola weg trappen, of liever nog, een stientie det op de weg lig. En het wördt edoane döar een Siske de Rat-achtig type, mar dan van het platteland. Hylke en Sietse Klinkhamer, die jongeluu van de Kameleon, as die van hun va op de donder ehad hebt, en as ze dan verongelukt oaver een dorpsweggetie loopt, in gedachten verzunken oaver wat d’r noe eigenlijk mis was met wat ze net uut evretten haa’n… Det is sjoksen.
En dan ‘oe poesterig vulen’. Det is minder mooi. Mar het zit d’r wel an te komm. Want de kerstdage stoat vöar de döare. ’s Monns goed ontbijten met de wichter, ’s middags borrel bie de schoonfamilie en ’s oams anschoem bie de oale luu. Doar wördt ie poesterig van. Een stukkie ‘wat hen sjoksen’ tussendöar helpt doar gin millimeter an met.
Ik weet al wel precies hoe as of det giet met mien gewicht. Doar slabaks ik de kommende wekken mar wat met hen.
Denne van Knöldert