Home / archiefcentraal / column denne van knoldert inkearing

column denne van knoldert inkearing

Niet ‘Twitteren’ mar ‘Inkearing’ had het woard van 2009 munn wönn. Vöarig joar wönn swaffelen (met oe piemeltie uut de broek langs iets in de openbare ruumte wrie’m), mar det was ömdat de jongens van Geen Stijl d’r lol in hebt het leam te verstoaren. Noe is Twitteren het ewönn, ömdet de verkiezingen al in november of erond bent. Inkearing mos het weane, bleek in november. En dan hebbe wie het oaver meansen met zwart geld die asnog töt inkearing komt, vertelt wat ze zwart op de banke hebt stoane, d’r een hoop belasting oaver betaalt, mar gin boete kriegt.

Mooi is det. Gin belasting betalen is diefstal. Want wat de iene niet betaalt, mut de aander mear betalen. Met de boetevrieje regel – die nog dit joar geldt – löp iedere dief die töt inkear kump zien straf dus mis. Zo lus ik d’r nog wel een paar. De man die al sinds joar en dag inbrekker is in zien vrieje tied, kump töt inkear, giet noar de politie en hoef nie de gevangenis in. De vrouw die al drie joar vremd giet, löp thuus vrolijk de huuskamer binn, leg de zonde uut en manlief zeg: “hearlijk liefie, det ie töt inkear ekomm bent.” De snelheidsmaniak die zien bekeuringen niet betaalt leg vöar de rechter uur det e nooit, mar dan ok nooit mear te hard zal riene en kump d’r zonder boete van of. Ik zeg al: mooi is det.

D’r schient in de joaren zeumtig en tachtig nogal wat zwart geld het land uut esluisd te weane. Koffers vol papiergeld gingen noar Zwitserland. Zo völle, det d’r per wekke een vrachtwagen vol geld terugge van Zwitserland noar Nederland erene werd ömdet de Zwitserse banke liever Zwitserse franken dan Hollandse guldens in de kluis had. Gek det d’r toen niemand een kear an de belle trök. Een bankdirecteur die de oaverheid d’r op wees det het wel heel raar was det die Zwitsers iedere wekke zo völle Nederlands geld bie mekare wussen te krieng. Mar ja, onder het volk det töt inkear kump, doar zit gin bankdirecteuren tussen. Die bent al lange wear in de oale zonde vervallen en schept de bonussen met een grote batse bie mekare.

Ik goa in 2010 ok inkearen. Het giet bie mie niet öm zwart geld, mar öm rood geld. Misschien kan ik doar ok wel boetevrie van of komm.

Denne van Knöldert

Lees ook

Wiegeliedjes en nachtmerries in Nicolaaskerk

WIJHE – Sinje Kiel en David van Ooijen verzorgen op zaterdag 7 augustus een concert …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.