Home / archiefcentraal / column denne van knoldert ecclesia

column denne van knoldert ecclesia

Ie hebt van die momenten in oe leam det ie precies weet woar as of det ie waa’n toen d’r iets geböaren. Op de zundagmonn woarin de nacht doarvöar Lady Die was verongelukt, fietsen ik de Salland Route. En toen Arie Haan vanof de middellijn die balle heel hard in de krusing schöppen, toen stund ik met een pilsie in de haane bie de Leeren Lampe. Det was het WK van 1978.

Mear vöarbeelden? Toen Pim Fortuyn dood eschötten was, vieren ik vakantie op een camping in de buurte van Barcelona. Met de anslag op de Koningin ofgelopen april, was ik in een feesttente in Laag Zuthem woar ze – met kennisgeving – nog vrolijk de limbo dansten op het podium. Toen terroristen een begin maakten met de sloop van de Twin Towers gaf ik lesse in journalistiek. De middag vöardet Johan Cruijff met Ajax in Deamter teeng De Eagles mos, had ik een toernooi op het Rohdaveld, veld zes, scheidsrechter Theo Soolen. De dag det David Bowie optrad in de Amsterdam Arena was ik doar ok. En toen het standbeeld van Saddam Hoessein ömver ‘etrökken werd, zat ik in de auto en reed keihard noar huus öm het leste stukkie op de tillevisie te ziene. Zo kan ik nog wel eam döargoane.

Ik kom op det riettie ömdet mien olders lest vertellen woar ze waren toen John F. Kennedy vermoard was. Det was een onwoarachtig verhaal. Want zie haa’n det ezene op tillevisie. Earstens verbazen het mie det ze tillevisie haa’n in 1963. Twiddens was ik verrast det toen ok al zoiets vanuut Amerika dezelfde oamd op de Nederlandse tillevisie was.

Mar goed, Kennedy – of feitelijk Lee Harvey Oswald – had d’r nog wel een mooie oamd vöar uut etrökken öm het wereldnieuws te halen. Want de oale luu haa’n Ecclesia-groep an huus. Lange iederiene had toen nog gin tv. Hullie wel. Dus kon de hele buurte mooi meekieken.

Mar een Ecclesia-groep, wol ik weten, wat is det noe eigenlijk? “Proaten oaver de kerke”, was het antwoard en toen ik d’r later oaver noa ginge denken was det ok wel logisch. Ecclesia is gewoon Grieks vöar kerke. Mar mien kinderen geleum niet zo in det proaten oaver de kerke. Die gruuit op in een andere tied. Die dachen mear an “gewoon een oamd bie mekare zitten zoepen.” Sindsdien heet het vöarzitten vöar ze noar de kroeg goat ‘de Ecclesiagroep bie mekare roepen’.

Denne van Knöldert

Lees ook

Oosterhuis zangdienst in Wesepe

WESEPE – Op zondag 19 september vindt in de Protestantse kerk van Wesepe weer de …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.