Home / archiefcentraal / column denne van knoldert wachtwoard

column denne van knoldert wachtwoard

Ik hebbe d’r een hekel an as meansen oaver mien scholder metkiekt as ik an het werk benne. Ik doe de dingen graag op mien eigen maniere en as d’r iene met kik zu’j altied ziene det die het better denkt te weten. “Goh, sloa ie oe mail zo op?” “Hhm, as ie det met de linker moesknop doet giet het völle sneller.” “Wrum heb ie det niet zus en zo georganiseard?” Donder toch op, loat mie mien eigen gang toch goane.

Lest keek de directeur met. En dan wördt het spannend natuurlijk. Want ik heb een hekel an gareel, mar de directeur mut denken det ik doar heel goed in lope. Hij mos iets op mien computer ziene. Ik loggen in. Earst mien name, toen mien codewoard… Vöar ik wieder kon, trök de man wit weg. Earst zei e niks. Toen vroeg e of ik al lange het zelfde codewoard hadde. Codewoard? Hetzelfde? Hoe wus hij noe mien codewoard? “Zeum sterregies”, zeg e, “ ik zie toch zelf det ie die intikt?”

Toen ik det wat rondvertellen wus een moat het nog mooier. Hij had een presentatie ehad van iemand die met een smartboard werken. Vrogger ging det met een overheadprojecter. Noe met een smartboard. Hoe minder sheets, hoe better de presentatie, was vrogger een voestregel. Mar toen ik ooit iemand een heel volle sheet zagge gebruken met heel kleine lettertype, toen dach ik toch det die man het niet hillemoal begrepen had. Ik zat achter in de zaal en de spanningsboog was met een goeie vief minuten kats vot.

Teengwoardig hebbe wie smartboards. Het projectieschermen is dan oe beeldscherm. Met oe vingers op het scherm tikken, werkt as klikken met de moes. Heel handig, as ie d’r tenminsten wel rekkening met hoalt. Want kons zag ik d’r iene uut puur enthousiasme zien woarden kracht bie zetten döar onder het ‘kiek, hier stiet het wel’ op het beeldscherm te sloane. Floep, was de hele presentatie weg.

Mar ik zei al, mien moat wus het nog mooier. Inloggen op zo’n smartboard doe ie gewoon met een toetsenbörd en ie kiekt dan zelf op oe beeldscherm. Een zaal vol toehöarders zut op het grote scherm precies wat ie doet. Gevoarlijk, zo had mien moat ervaren. De vrouw die hem de presentatie mos gee’m typen haar codewoard in op de plekke van de name. Dan verandert de letters niet in sterregies. “Snoezepoesje” stund d’r. Van de presentatie is verder niks terechte ekomm. Mar de spanningsboog was wel heel lang.

Denne van Knöldert

Lees ook

Slotviering Pauluskerk; einde tijdperk

RAALTE – De Pauluskerk wordt op zondag 3 oktober officieel aan de eredienst onttrokken. Dat …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.