column denne van knoldert spreukies

Ik zagge det d’r een buukie uut ekomm was met spreukies vöar volwassenen. Ik hebbe mie d’r eam in verdiept en toen bleek al gauw det het heel wat aans was as det ik dache. Persoonlijk dach ik an het sprookje Geert Wilders, een schertsfiguur die dan achterof hillemoal niet echt blik te weane, mar det de ien of aandere communicatiedeskundige op een gegeven moment vöar de droad zol komm met een grap. Een bittie Banana Split met Frans Bauer. Onthulmoment: 1 april.

Zol mooi weane. Was het achterof ollemoal ien grote grap. Van die kopvoddentax, van det dubbele paspoart, Fitna… en de Engelsen zaten ok in het complot, want Wilders mog het land best wel in. “Knettergek bent Julie, ollemoal”,zei e in de Twidde Kamer en de camera mos gauw wegdreien van de hoofdrolspöllers, want d’r scheut d’r iene in de lach die niet zo goed kon actearen. Ok det wetenschappelijk onderzuuk det Wilders een racist is, het zol wel woar weane as het echt was, mar het bleek dan niet echt. Sprookjes vöar volwassenen.

Mar Wilders is wél echt woar.

Ik heb vrogger ok eek kear met ewerkt an zoiets. As bestuur van de KPJ haa’n wie de leden e’zeg det d’r een uutwisseling met het butenland was en det wie as bestuur earst mar ‘ns een wekke doar ging kieken. Op kosten van de vereniging natuurlijk. “Is goed”, zeiden de leden. Op een handlanger van het bestuur noa, as of esprökken protestearen hij heftig. Eam later waren álle leden boos. Wie mossen de notulen van de bestuursvergadering d’r bie halen öm ze te oavertuung det het een grap was, öm ze scherp te krieng.

Mar Wilders is wél echt woar.

Nederland wördt verboden terrein vöar de grieze eekhoarn en de Amerikaanse voseekhoarn. Minister Gerda Verburg hef disse uutheemse eekhoarns verboden ömdet ze een bedreiging bent vöar de eekhoars die van nature in Nederland vöarkomt.

As Wilders det mar niet least, want Wilders is echt woar.

Ik keek op tillevisie noar ‘De Oorlog’ en höaren det Seyss-Inquart (zes en een kwart) baas van de provincie Nederland werd. Met behulp van Hollandse ambtenaren zörng hij d’r vöar det iederiene een legitimatiebewies kreeg. En Joden kreeng d’r een J bie in. “Och, vöar de helderheid”, zei de racist en achter de schermen bereiden hij deportaties vöar.

As Wilders det mar niet e zene hef, want Wilders is echt woar.

Wilders is gin spreukie. Det buukie met sprookjes vöar volwassenen was iets aans. Het ging oaver Sneeuwwitje die heel aandere dinge dut met de zeven dwergen dan in het echte sprookje.

Denne van Knöldert