Home / archiefcentraal / column denne van knoldert magnetisch

column denne van knoldert magnetisch

Wie haa’n lest een aandere katte dan die van oons zelf in de huuskamer stoane. Det was vöar de oonzen nog wel eam schrikken, want die was nieuw en had nog gin tied ehad zien territorium of te bakenen. As wule Geert Wilders an zollen pakken zo as oonze katte de buurmankatte, dan waren wie in oons land snel wear van det rechts radicale gedoe of. Hij greep de indringer in zien stat, krabben ‘m bienoa een oog uut en toen het beest het op een rennen zetten, happen ‘m nog vlug eam een plukke hoar uut de rugge. Vot was de katte, weg de annexatiedrift.

Wie hebt doarnoa maatregelen enömm. Wie hebt noe thuus een soart van Maginotlinie, die de geallieerden anleggen öm de Duutsers teeng te hoalen. Oonze verdedigingslinie bestiet uut een kattenloek met magneet. Van binnen noar buten giet het luukkie altied gewoon open. Van buten noar binnen lukt het allenig mar met een magneet. Oonze katte hef zo’n magneet öm de hals. Wul e d’r in, dan trekt de zuudpool van zien magneet een noordpool van een hefbeumpie in het kattenloek an. En doarmet ontgrendelt hij het loek.

Mar hillemoal zuver werkt het niet. Zo mut onze Dikkie rustig de tied nemm binnen te komm. Lest was e eschrukken van een luchtballonne en toen wol e op volle draf döar het loek het huus in. Mar de ontgrendeling ging te langzaam, woardöar Dikkie met volle vaart teeng het loek kletsen.

Ok lastig is det de magneet aander iezer antrekt. Zo leup Dikkie lest met een stuk of vieftien paperclips an de nekke rond. Hij was op het bureau esprung en doar heb ik een bakkie met die dinge stoane. Hád ik zo’n bakkie met die dinge stoane. Want het bakkie was löag.

Of lest, toen wie een spöltie in de kamer e gooid haa’n, een tennisballegie det ok as slöttelhanger dient kon doene. Bleef det iezerwerk van de slöttelhanger an de magneet zitten. Nou, det was nog heel lastig vechten met die tennisballe. Dikkie wönn d’r kats gek van.

Toen e van de wekke met de hals oaver de grond oaver de plavuizen van de huuskamer scheuf, dach ik earst an een ernstige verwonding. Mar het bleek een grote nietmachine te weane. Zó zielig, det wie de magneet verwijderd hebt en het kattenloek vervangen. Hoppelijk is het territorium uut ezet.

Denne van Knöldert

Lees ook

Plannen voor woongroep bij boerderij Heeten

RAALTE – Het Raalter college van B&W is in principe akkoord met de plannen voor …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.