Home / archiefcentraal / column denne van knoldert wortelkanaal

column denne van knoldert wortelkanaal

Een ofspraak van neengtig minuten haan ze d’r vöar e maakt. “En dan mut ie een moand later nog ‘ns een kear wear terugge komm”, zeien ze d’r bie. Dus die wortelkanaalbehandeling die ze mie in het vöaruutzicht esteld haan, det had nog wel wat öm het lief.

Ik bin al gin held in de tandartsstoel en noe dit. Het begun al op de legere schoele. As die grote grieze Bedfort van de schooltandarts de spölplaatse opdreien, was ik een hele wekke an de diarree. Iedere kear as de assistente de döare van die beulswaang uutkwaamp, volgen ik iedere stap oaver het schoelplein, de schoolhal in, de gang noar oons lokaal en dan, dan ging e net een klasse earder noar binnen. Was ik het nog eam vrie ekomm. Mar uuteindelijk mos ok ik noar de slachtbanke.

Dus groot was de opluchting toen de smoelensmid niet mear op schoele kwaamp en mien oalders de half joarlijkse controle bie tandarts Gelhard vergaten. Pas 25 joar later was de lol doaroaver verbie. Ik kreeg tandpiene en had gin tandarts. Een kennis in Zwolle had een praktijk en die wol d’r wel ‘ns heel vöarzichtig noar kieken.

Op een goeie donderdag – noa een heel slechte nacht – parkearen ik mien auto an de Oale Deamterstroate op een aander huusnummer dan ze mie haan op egeem, mar d’r was een tandartspraktijk, dus det mos goed weane. Mar diepe oaver de ofspraaktied hen, wönn d’r allenig nog mar stof ezöang. Gin tandarts te verkennen. Bie noavroag mos ik niet an de Oale Deamterstroate op een verkeard nummer weane, mar an de Deamterstroate op het goeie nummer.

Een mooie vuurdoop dus. Ik leut det nog ’ns rustig de revue passearen toen ik het earste uur van de neengtig minuten d’r op hadde zitten. De tandarts had binnen een minute het earste wortelkanaal evunn. De verdoving bleek toen nog niet hillemoal te werken. Met een kwartier had e kanaaltunnel nummer twee. Mar de derden, “tja, ik zol toch zeng det e hier eans mos weane”, zei ze vertwiefeld teeng de assistente. “As ik nog verder boare blif d’r van die tand niks oaver.”

Toen ze besleuten d’r een collega bie te halen “want die is wat sterker dan ik, misschien kan die d’r döarhen komm”, deud ik een schietgebedje oaver de kwaliteit van de verdoving. De krachtpatser stund vief minuten later an de stoel, schurken zien boek teeng mien wange, fluiten het Amerikaanse volkslied, pakken de boare en zei: “kiek, doar is e al.” Oaver een moand doet ze de rest.

Denne van Knöldert

Lees ook

Slotviering Pauluskerk; einde tijdperk

RAALTE – De Pauluskerk wordt op zondag 3 oktober officieel aan de eredienst onttrokken. Dat …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.