Home / archiefcentraal / column denne van knoldert retro

column denne van knoldert retro

Alles wat vrogger gewoon was, is noe iniens mode. Zo heb ik foto’s van mie zelf die ik töt vöar kort angstvallig uut het zicht van mien wichter heul. Ik hebbe d’r namelijk een brille op, woar ik mie liever niet mear mee loat ziene. Zo’n heel groot zwart montuur. Ik geleuve niet det e van bakkeliet is, mar het lik d’r wel op.

As ik noe op stroate rond kieke, dan kan het niet aans of d’r loopt vanwege de hedendaagse mode heel völle meansen rond met een brille op de kop woar ze oaver tien joar liever niet mear an herinnerd wördt. Al die foto’s mut dan ollemoal angstvallig verstopt wönn vöar de volgende generatie. Een hele klus. Want wule maakt teengswoardig völle mear foto’s dan vrogger. En die foto’s komt ok nog ’ns kear oaveral terechte. Google mar ‘ns op een disco of braderie en de kans is groot det ie oe zelf dansend of flanerend teengkomt op de ien of andere site. En is het doar niet, dan wel op de Hyves van oe kinderen. Want niks is mear geheim.

Hoe die brillenmode noe zo iniens öm de hoek kump kieken? Ik denke det de ien of andere modekoning te völle coke esnöam had, in een lachkick zo’n gekke brille uut een verkleeddeuze opzetten, doar bint toen foto’s van emaakt en toen e wear nuchter was hebt ze d’r een neeje modelijn van emaakt. Retro.

Met die brille niet, mar vöar de rest probear ik een bittie mee te doene met die mode. Zo strikken ik vrogger mien veters netties. Mar met det de schoenmode richting gympies ging, wönn het strikken ok minder belangriek. Net as rekkenen en taal leart de wichter det niet mear op de basisschoele. In plaatsen van een strikdiploma, hebt ze eleard de veters nonchalant half löss te loaten hang. Zo löss, det feitelijk ieder paar schoene instappers wördt. Makkelijk is det, dus ik deed met. Zag ik van de wekke det löss strikken uut is. Zie legt d’r teengwoardig een knöp in… Foei wat dom. Ömdet het mode is dut de jeugd met. Mar ik haak of. Ik goa het beste mar wachten töt de mode verandert in ‘gewoon strikken’. Dan ben ik ok wear modebewust. Net as met die aanderen veters, reetveters ofwel strings. Halve garen die die dinge an deden. Mar het is inmiddels uut de mode. Dus ik ben ok wear modieus.

Denne van Knöldert

Lees ook

Koken voor Kerels in de Mozaïek

LEMELERVELD – Er zijn nog enkele plekjes vrij voor de cursus Koken voor Kerels in …

Geef een reactie

Het e-mailadres wordt niet gepubliceerd. Vereiste velden zijn gemarkeerd met *

Deze website gebruikt Akismet om spam te verminderen. Bekijk hoe je reactie-gegevens worden verwerkt.